DEN HAAG – Cacahipun 12% non-muslim ing Walandi sarujuk menawi Idul Fitri dipundadosaken dinten riáyá resmi nasional. Responden muslim 63% sarujuk.
Makaten kasilipun panjajagan déning nu.nl tumrap 2.331 rèsponden non-muslim lan 371 rèsponden muslim ing Walandi. Kirang langkung 1 jutá muslim Walandi dinten Kemis kapengker mungkasi sasi Ramadan kanthi riáyá Idul Fitri ingkang dipunwastani ing Walandi: Suikerfeest.
Kathahipun 71% non-muslim boten sarujuk menawi Idul Fitri dados dinten riáyá resmi nasional, éwodènten 17% sanesipun milih boten maringi panemu. Sawetawis 63% responden Muslim sarujuk, 14% boten sarujuk, 23% sanèsipun boten ngaturaken panemu.
Dinten riáyá resmi nasional tegesipun dèrèng temtu per definisi dados dinten libur makaryá utawi libur sekolah. Babagan makaten ing Walandi dipunrembug kanthi ndhèrèkaken perusahaan lajeng dipunlebetaken ing prajanjian makaryá.
Sawetawis puniká kathahipun 34% non-muslim ing Walandi ngalem sanget tumrap tiyang-tiyang ingkang nglampahi siyam Ramadan. Sinten nglampahi siyam kedah antawisipun boten ngunjuk, boten dhahar, boten udud, boten ‘campur’ kalih garwanipun.
Lajeng 30% non-muslim ing Walandi ugi kagungan panemu bilih supermarkèt sampun cekap nggatosaken sasi Ramadan, antawisipun kanthi wujud reklame lan korting. Éwodènten responden muslim boten marem kaliyan pambabaran toko-toko kanggé Ramadan lan Idul Fitri: 45% menggalih bilih wigatosan tumrap dinten riáyá taksih sakedhik.
Idul Fitri utawi ing Walandi dipunwastani Suikerfeest inggih puniká dinten riáyá minongká pungkasanipun ibadah siyam Ramadan. Ing dinten riáyá puniká miturut tradhisi ing Walandi kathah pasegahan sarwá manis, pramilá dipunwastani Suikerfeest (dinten riáyá gendhis, sarwá manis-manis). (es/es)