DEN HAAG – Gusti Kanjeng Ratu Máxima dinten Senèn, 17 Mei 2021 puniká tanggap warsá ingkang kaping 50. Minongká riáyá dipunparingaken 3 foto énggal.
Ingkang mundhut utawi motrèt foto-foto wau inggih puniká garwá kinasih Ngarsá Dalem Rájá Willem-Alexander piyambak ingkang salajengipun dipunandumaken dumateng media mawi Rijksvoorlichtingsdienst kados ingkang dipuntampi déning Het Javaanse Blad, dinten Ngahad (16/5/2021).
Foto-foto ingkang bènten-bènten wau dipunpundhut ing taman Kraton Huis ten Bosch awal sasi Mei punika. Wonten ing 2 foto Gusti Kanjeng Ratu ketingal ngagem coltrui warni pethak, lajeng ing satunggal foto sanèsipun piyambakipun ngagem jas corak coklat kothak-kothak.
Sadèrèngipun Gusti Kanjeng Ratu Máxima sampun dhawuh bilih sarèhning wonten pagebluk Corona namung badhé maringi pistá riáyá kanthi prasájá. Malah Gusti Kanjeng Ratu minggu kapengker sampun riàyá dinten tanggap warsánipun mawi keliling Walandi, antawisipun migatosaken supados langkung kathah piwulangan musik kanggé siswá SD.
Lajeng naliká tilik kriyá dateng taman sekar tulip De Keukenhof ing kuthá Lisse, Gusti Kanjeng Ratu Máxima ngendiká bilih piyambakipun bingah manah saget dugi sepuh tur séhat.
“Puniká ingkang paling wigatos ing dinten tanggap warsá kulá kaping 50,” makaten Gusti Kanjeng Ratu Máxima. (es/es)
