SURÁBÁYÁ – Serat Jurumartani Ongká 1, 7 Januari 1869. Pawartos saking Surábáyá anyariyosaken kados ing ngandhap puniká:
Surábáyá kaping 17 Dhésèmber 1868, kálá wingi énjing saweg kendel jam gangsal, tiyang manggihi jisimipun Walandi wonten margi ing kampung Pacinan Surábáyá, katingal pejahipun puniká boten saking déning kataton.
Kálá samanten sareng paréntah tuwin tuwan dhokter kalapuran bab wontenipun jisim wau, lajeng atiti pariksá ing ngriku tetelá bilih Walandi ingkang
pejah puniká saking Kadhiri anumpak baitá, dumugi kareteg ing bibis nyipeng sadalu.
Sareng wanci angajengaken ebyar saking aturanipun tiyang ingkang nglampahaken baitá, tuwan wau menggah dhateng dharatan, déné pikajenganipun badhé tumbas jampi awit piyambakipun karaos sakit.
Lampahipun dhateng griyanipun Ciná, anothok korining griyá ingkang lajeng kaéngakaken. Sarèhning Ciná ingkang gadhah griyá boten naté kadhatengan Walandi ing wanci énjing taksih peteng, milá lajeng anginten bilih Walandi ingkang anothok kori puniká Matrus, kalampahan kori énggal kakancing malih.
Kálá samanten Walandi ingkang sakit tumunten nglajengaken ing lampah, nanging watawis saweg angsal kalih tindak tebihipun saking griyaning Ciná wau lajeng dhawah, nunten tuwan Sekaut ing wanci satengah nèm aningali jisimipun Walandi wau wonten panggènan ing ngriku (bron: KITLV).
