PEKALONGAN – Residèn Pekalongan ngaturi pirsá bilih amargi banjir ing dinten kaping 1 lan 2 sasi Februari kapengker kathah kreteg dhusun, tanggul, lan bendungan ingkang jebol, makaten Het Nieuws van den Dag voor Nederlandsch-Indië, dinten Setu (16/3/1901).
Kejawi puniká ugi risak awrat kreteg-kreteg irigasi ing margi ageng antawis Limpung-Tersono, lan margi antawis Tersono-Plantungan, saénggá kreteg-kreteg wau boten saget dipunginaaken kanggé lalulintas.
Amargi banjir ugi bagéan margi ageng ing Klidang risak sanget, semanten ugi margi énggal ing Petungkerep, boten tebih saking stasiun Roban (kecamatan Subah), lajeng margi Doro-Yosorejo, Yosorejo-Pesanggarahan Petungkriono, Yosorejo-Kayupuning, sáhá Lebakbarang-Ketingkrang lan Lebakbarang-Karanganyar.
Sawetawis ing Brebes margi Daendels jebul langkung inggil tinimbang dhusun utawi kampung kiwá tengenipun. Tinimbang wekdal sadèrèngipun mongsá rendheng jeroaken got-got utawi ndhudhuk got malih, malah boten wonten tumindak punápá-punápá, akibatipun toyá jawoh saking margi Daendels mili nuju panggènan párá wargi saénggá tansah banjir lan jemèk.
Kanggé ilèn-ilèn toyá margi Daendels pancèn dipunwigatosaken tinimbang keséhatan párá wargi, ingkang dhasaripun sampun boten paham karesikan, lajeng perkawis njeroaken got kiwá tengen margi dipunpasrahaken dumateng Walandi, ingkang kagungan kesaguhan ing perkawis puniká.
Pramilá pangajeng-ajeng sapuniká gumantung kalih camat énggal Brebes, nggih puniká Douwes Dekker, ingkang nembé nggantosaken camat De la Parra. Tugas camat De la Parra ing Brebes dèrèng dangu, nanging dipunmutasi dhateng Pasuruan ing Jawi Wétan.
