WARUNGASEM – Ing kuthá alit Warungasem sampun wonten pandhuis (griyá pagadéan) negari utawi kagungan pamréntah wiwit taun 1911.
Pagadéan puniká griyá panggènan ngampil artá mawi borg (jaminan arupi barang ingkang aji, red) kanthi jángká wekdal ingkang dipuntemtuaken, lajeng barang wau dipuntebus nganggé rènte, menawi boten dipuntebus, barang jaminan wau dipunlélang.
Sarèhning wonten beslit (kaputusan) pamréntah tanggal 10 Februari 1911 No. 53 (Staatblad No. 149) pramilá dipuntemtuaken bilih wiwit tanggal 1 Juli 1911 paleksanan Griyá Pagadéan ing wilayah karésidènan Pekalongan dipunurus déning pamréntah piyambak.
Sarujuk kalihan beslit wau, Wakil Direktur Griyá Pagadéan Pamréntah ing Temanggung J. W. Franken dipunmutasi (pindhah) dateng Griyá Pagadéan Warungasem, Batang.
“Kejawi distrik-distrik Tegal lan Adiwerna, kabupatèn Tegal,” makaten kados kapethik saking Het Nieuws van den Dag voor Nederlands-Indië dinten Selásá (21/3/1911).
Ugi wiwit tanggal 1 Juli 1911 Griyá-griyá Pagadéan kagunganipun pamréntah badhé nglenggahi kantor-kantor: 1 ing Warungasem, 1 ing Batang, 1 ing Limpung (wilayah kabupatèn Batang), 1 ing Pemalang, 1 ing Comal, 1 ing Ulujami, 1 ing Randudongkal (wilayah kabupatèn Pemalang).
Salajengipun 2 ing Pekalongan, 1 ing Wirádesá, 1 ing Kedungwuni, 1 ing Sragi (wilayah kabupatèn Pekalongan), 1 ing Slawi, 1 ing Lebaksiu, 1 ing Margasari (wilayah kabupatèn Tegal), 1 ing Brebes, 1 ing Ketanggungan, 1 ing Tanjung, 1 ing Jatibarang, 1 ing Bumiayu (wilayah Kabupatèn Brebes). (es/es)