PEKALONGAN – Kanggé nggantosaken peken Klidang (sadèrèngipun: Peken Klidang Resmi Tutup) ingkang sampun risak, peken énggal ing Batang sapuniká sampun rampung lan saget dipunanggèni, makaten De Preanger Bode, dinten Jemuah (11/01/1918).
Peken puniká kalenggahanipun boten tebih saking tengah kuthá (sapuniká sisih kiwá margi ageng Jl. Jend. Sudirman, arah Pekalongan-Semarang, red), sareng kaliyan stasiun énggal ingkang sapuniká langkung radi tebih, saénggá kuthá Batang dados tambah wiyar.
satá, ngoko: tembako, mbako
Miturut De Preanger Bode, párá wargi Ciná ing Batang maringi sumbangsih ingkang boten sakedhik anggènipun ngraméaken dedagangan sáhá lalulintas, ugi saget dipuntingali saking pinten-pinten grobag sewá ing plataran stasiun.
Ibukuthá distrik Batang nggadhahi wargi Cina kirang langkung 2.000 tiyang, ewádènten wargi Eropa wonten 36 tiyang. Párá wargi Ciná wau kathahipun manggèn ing Klidang, ingkang taksih kalebet kuthá Batang.
Para wargi Ciná ing Klidang nglampahi dagang satá, utaminipun satá kulakan saking Wonosobo. Dados Batang puniká kados Paraan ingkang kaping kalih, bèntenipun Ciná ing Paraan dados panyambung langsung antawis párá tani satá pribumi kaliyan pedagang.
