INDRAMAYU – Taun 1933 jaman Walandi naté kedadosan perang sengit saingan antawis ijsfabrieken (pabrik-pabrik ès) ing Indramayu. Jalaranipun nggih puniká pangadegan pabrik ès énggal “Bouw Hien” kagunganipun tiyang Tionghoa.
Perang saingan dagang wau antawis pabrik ès énggal Tionghoa puniká kaliyan pabrik-pabrik ès ingkang sampun mapan kagunganipun meneer Colenbrander, tiyang Walandi ing Indramayu lan kongsi pabrik ès O. T. V. Y. ing Cirebon.
Reginipun ès dados anjlok saking 1,5 gulden dados 0,20 dugi 0,30 gulden per pond. Malah regi ècèran ing dhusun-dhusun paling mencil ngantos 1/2 sèn per pond, makaten De Locomotief, serat kabar babaran Uitgever De Groot, Kolff & Co, Semarang, dinten Rebo (7/6/1933).
Satunggal-satunggaling cárá kanggé mulihaken karukunan nggih puniká pabrik ès énggal wau dipunlebur mlebet kongsi ingkang sampun wonten, nanging sedáyá anggota kongsi boten saget nampi. Párá anggota kuatos mangké malah ndorong langkung kathah tiyang ndamel pabrik.
Pungkasanipun dipuntetepaken bilih perang saingan dagang badhé dipunlajengaken dugi salah satunggaling pabrik kalah. Menawi kedadosan makaten, pramilá langkung gampil tumrap O. T. V. Y. kanggé mundhut jangkah nindakaken rembugan ndamel perjanjian kaliyan pabrik sanèsipun.
Sawetawis puniká wilayah perang saingan dagang alon nanging pestèn sangsáyá ámbá dugi wilayah Cirebon, malah dugi Tegal, lan dipunprakiraaken bakal kados makaten dugi pungkasan taun puniká.