PEKALONGAN – Jawoh sampun seminggu boten mandheg ing Pekalongan lan wilayah saputeranipun. Kasilipun: kampung-kampung ing dalem kuthá dados banjir.
Kados tuladhanipun menawi badhé mlebet kampung Bendan, Sobrahan kedah cincing ageman dugi pupu supados boten teles, makaten De Locomotief dinten Kemis (25/1/1940).
Sarèhning jawoh boten mandheg ndadosaken lepèn Kali Pekalongan mlubèr, miturut lapuran sampun mundhut korban satunggal. Monggo sami dedongá mugi-mugi kretek Loji kiat saget nahan terjangan toyá.
Salajengipun Kali Pèntjongan ugi muntab banjir. Saking lepèn puniká párá kawulá biasa mundhut wedhi kanggé bangunan. Amargi banjir wau bakul-bakul wedhi ugi kapeksá tutup boten saget makaryá. Ewodènten segárá lèr ombakipun ugi ganas, tiyang-tiyang pesisir boten wantun tindak mayang.
Lajeng margi-margi ugi dados lunyu. Satunggaling wargi tiyang Jawi yuswá 50, naliká mlampah saking Pandjang badhé nuju Setoerie dhawah keplarak lajeng pejah digotong wangsul mlebet griyanipun.
Kasangsaran sanèsipun amargi jawoh seminggu boten mandheg párá kawulá boten saget mépé ageman, kedah njèrèng nganggé geni, akibatipun regin areng dados mindhak. Mugi-mugi naliká maos kabar puniká srengéngé sampun nyinar anget bentèr (es/es).