BATANG – Jatin kalih Soertani, 2 kusir délman saking dhusun Pesalakan (Batang) pinten-pinten dinten kapengker sami tukar padu, pasulayan. Jatin ambruk dipunkepruk nganggé gendul, makaten kapethik saking De Locomotief (18/10/1932).
Jalaranipun amargi kusir Jatin, ingkang taksih nyepan (masang) turánggá ingkang ageng ing délman sewaanipun, ngaling-alingi dèlman kusir Soertani ingkang badhé ndhèrèk langkung. Kusir Jatin malah misuhi Soertani, lajeng piyambakipun ngraos kenyèk lárá ati.
Sarèhning Soertani boten wantun piyambakan ngadhepi Jatin, piyambakipun madosi réncang balanipun inggih puniká Kariso, lajeng saget ngyakinaken Kariso kanggé mbales dendam kalawan Jatin.
Sesarengan lajeng Soertani lan Kariso nenggá ngadhang Jatin. Naliká Jatin sampun rampung makaryá lajeng badhé wangsul griyá, Soertani lan Kariso ngroyok nyerang piyambakipun. Kariso ingkang mbetá gaman gendul lajeng ngepruk sirahipun Jatin saking wingking. Jatin lajeng ambruk dhawah kesakitan nyuwun tulung.
Wargi sakitaripun ingkang mireng swanten nyuwun tulung lajeng gègèr dugi mriku. Soertani lan Kariso mlajar. Jatin kanthi tatu nemen ing sirahipun lajeng dipuntulungi. Pulisi ugi énggal dugi panggénan, lajeng mbetá Jatin dateng griyá sakit ing Pekalongan.
Adhedhasar katerangan saking Jatin, pulisi lajeng nyepeng kusir kekalih inggih puniká Soertani lan Kariso. Minongká barang bukti, pulisi ugi mbeslah gendul sáhá pecahanipun ingkang nancep ing sirahipun Jatin, lajeng ageman Jatin ingkang kebak rah.
Soertani lan Kariso ing ngarsaning pulisi ngakèni sedáyá tumindakipun, lajeng saénggalipun badhé dipunbetá dateng landraad (pangadilan). (es/es)