DEN HAAG – Sasampunipun setengah taun dangunipun lockdown, pamréntah Walandi wiwit dinten Rebo, 28/4/2021, resmi nglonggaraken pranatan kanggé nanggulangi pagebluk Corona.
Restoren lan café kénging bika malih, kawulá Walandi saget nampi tamu 2 saben dinten, saget blánjá malih tanpá janjian sadèrèngipun, ugi boten wonten jam malem malih. Jam malem namung dugi dinten Rebo, 28/4/2021, jam 04.30.
Kawulá Walandi saget tindak dateng café malih, nanging dipunwatesi namung antawis jam 12.00 dugi jam 18.00 lan kedah wekas panggénan sadèrèngipun. Lajeng menawi sampun dugi café kedah nglampahi pamriksan keséhatan miturut protokol Corona.
Ugi saben mejá boten kénging langkung saking 2 tiyang, kejawi wonten bukti taksih satunggal kaluargi utawi laré yuswá kirang saking12 taun. Cacahipun ingkang kénging lenggah ing téras paling kathah 50 tiyang. Menawi badhé nilaraken mejá, upaminipun badhé tindak toilet, kedah nganggé masker.
Kadosipun regi unjukan ugi bakal mindhak sarèhning séktor puniká sampun ngalami tuná boten kinten-kinten amargi pagebluk Corona ingkang dangunipun sampun ngancik taun kaping kalih. Pabrik-pabrik unjukan ugi sampun wárá-wárá badhé mindhakaken reginipun.
Sarèhning idin biká sawetawis namung dugi jam 18.00, pramilá dèrèng kénging pinarakan dhahar dinner. Tamu café namung saget dhahar siang, utawi ngunjuk rupi-rupi unjukan sanèsipun.
Pakumpulan horéca (hotel-réstoran-café, red) KHN mastani bilih idin téras kénging bika malih wau minongká kamajengan kanggé sebagéan sudagar (boten sedáyá café lan restoran nggadhahi téras).
“Puniká cahyá padhang, nanging taksih déreng cekap,” makaten KHN. Pakumpulan puniká nyuwun dumateng pamréntah supados palonggaran puniká dipunlonggaraken malih.