DEN HAAG – Saben taun tanggal 4 Mei ing Walandi dipunprèngeti Nationale Dodenherdenking (Prèngetan Nasional tumrap Ingkang Gugur) naliká jaman Perang Dunia II (1939-1945).
Ngarsá Dalem Rájá Willem-Alexander kadhamping dèning Kanjeng Ratu Máxima kaping sepindhah ngaturaken karangan sekar atas nami sedáyá kawulá Walandi. Karangan sekar puniká dipunaturaken naliká mèh dipunwiwiti hening ciptá.
Rawuh ugi ngaturaken sekar ing prèngetan puniká minongká wakil kabinèt antawisipun Perdana Menteri Mark Rutte, Menteri Pertahanan Bijleveld, Menteri Muda Keséhatan Blokhuis, sáhá menteri-menteri Besaril, Begina, Violenus minongká utusan Aruba, Curaçao lan Sint Maarten. Prèngetan puniká kados taun kapengker boten saget dipunrawuhi párá kawulá amargi pranatan Corona.
Persis jam 20:00 sedáyá ing tanah Walandi mandheg anteng nindakaken hening ciptá dangunipun 2 menit. Bus, tram sáhá sepur sedáyá ugi mandheg. Ing dinten puniká Nationaal Comité 4 & 5 Mei ngawontenaken rupi-rupi parigawé.
Wekdal sapuniká ing dinten tanggal 4 Mei sedáyá ingkang gugur naliká pasulayan militèr sanèsipun (kados jaman Agrèsi Militer ing Nederlands-Indië (Hindia Walandi, Indonesia) sáhá operasi bedami antawisipun ing Libanon, Bosnia, Afghanistan utawi Mali) ugi ndhèrèk dipunprèngeti.
Párá militer Walandi ingkang gugur antawis taun 1945 lan 1962 ing Nederlands-Indië sáhá Nieuw-Guinea, dipunprèngeti kanthi khusus saben dinten Setu kaping sepindhah ing sasi September naliká Prèngetan Nasional wonten ing monumen Hindia Walandi ing kuthá Roermond.
Prèngetan antawisipun ngemu upácárá, lajeng nyumèlèhaken karangan sekar ing alun-alun Dam, Amsterdam dèning Ngarsá Dalem Rájá Willem-Alexander sáhá sedáyá pandhèrèkipun minongká wakil pamréntah, tentara, gerakan perjuangan, lan rupi-rupi organisasi sáhá golongan ing masyarakat.