DEN HAAG – Puniká 6 pitedhah emas saking ‘dokter poep’ Nienke Gottenbos kersanipun usus panjenengan tetep ing kahanan top lan boten strès.
1. Gantos dhahar siang mligi nganggé sayur
Dhahar siang nganggé roti utawi sekul jané boten kathah ngandhut zat-zat gizi, pramilá langkung saé monggo gantos dhahar siang mligi nganggé sayur. Kanthi dhahar siang miligi nganggé sayur panjenengan saget pikantuk langkung kathah zat-zat gizi, ugi saget gampil dugi wates minimal dhahar 250 gram (1/4 kg) sayur per dinten. Sayur puniká saget dipuntumis kalih lawuh tigan godhog (utawi monggo kersá), sup, gadho-gadho, pecel, utawi salad.
2. Ngéndhani strès
Menawi panjenengan kathah strès, pramilá rah (getih) sáhá zat-zat gizi nuju otot lan utek supados saget menggalih lan nanggepi strès kanthi saé. Sistem pangluluhing dhaharan mbetahaken kahanan tentrem supados saget optimal makaryá fungsinipun. Nembé ing kahanan makaten zat-zat gizi badhé nuju sistem pangluluhing dhaharan, saènggá saget medal asem padharan lan ènzim-ènzim kanthi cekap. Naliká panjenengan strès, puniká mengaruhi tumrap flora usus lan kesèhatan bagéan sanèsipun. Kosok wangsulipun menawi flora usus boten bèrès, panjenengan saget ngraosaken strès. Rilèks. Ugi menawi tindak wingking (toilet) ampun kesesá.
dhaharan fermentasi saé sanget kados kimchi, kèfir, lan kombucha
Nienke Gottenbos
3. Lenggah nDhodhok
Ing bagéan akhir usus panjenengan wonten sindhetan, ingkang njagi supados poep boten mbrojol menawi panjenengan jumeneng utawi mlampah. Menawi panjenengan kedah tindak wingking nganggé toilet modern (lenggah), pramilá sindhetan wau mbika namung sebagéan mawon. Supados poep saget medal, panjenengan kedah ngeden. Pramilá kanthi alami manungsá ndhodhok. Puniká ingkang ideal, sarèhning sindhetan wau saget mbiká sampurná. Menawi panjenengan gadhahipun toilet lenggahan, sikap ndhodhok wau saget dipuntiru kanthi bancik dingklik supados dengkul panjenengan langkung inggil saking wudel. Kanthi cárá puniká panjenengan sami kados ndhodhok, saéngga poep langkung gampil medal, tur saget ngéndhani ambeien.
4. Nganggé bumbu
Kanthi nganggé rupi-rupi bumbu ing masakan, panjenengan saben dinten saget pikantuk zat-zat ingkang mbiyantu pangluluhing dhaharan. Zat-zat ingkang ndorong lever aktif lan ndamel sari pangluluhing dhaharan. Pramilá monggo nganggé bumbu kados kunir, jahé, rosemari, tijm lan brambang pethak.
5. Énggal madosi dokter
Kathah tiyang ngalami gangguan ing ususipun, nanging nembé tindak dateng dokter menawi sampun nemen sanget. Menawi panjenengan asring ngraos eneg, kembung, utawi poep boten lancar puniká pratándhá wonten ingkang boten bèrès. Kanthi énggal priksá, panjenengan saget énggal saras malih. Panjenengan ugi saget èkspèrimèn mawi kalih minggu nyerat dhahar nápá lajeng pikantuk gangguan nápá. Saget mawon gangguan wau jalaran produk susu (ngandhut lactose), utawi amargi strès. Menawi saget kepanggih polanipun, pramilá panjenengan saget ngéndhani piyambak.
6. Dhahar produk fermentasi
Produk fermentasi ngandhut bakteri-bakteri gesang kasebat probiotica avant la lettre ingkang manfaat kanggé flora usus. Jaman dèrèng wonten kulkas, manungsá biasa fermentasi sayur-mayur supados saget awèt. Kitá jané biasa dhahar produk fermentasi dugi 30 taun kapungkur sasampunipun kepanggih teknologi kulkas. Wekdal sapuniká dhaharan fermentasi wau ramé malih, kados kimchi, kèfir, lan kombucha. Sedáyá wau saé sanget kanggé kesèhatan usus utawi sistem pangluluhing dhaharan.