BRUSSEL – Langkung saking sepalih wargi Eropa sapuniká sampun pikantuk vaksin jangkep, makaten pangarsá Komisi Eropa Ursula von der Leyen ing Twitter dinten Kemis.
Ewodènten Walandi sampun dugi 56% jangkep vaksin (suntik kaping kalih), kalebet inggil saking rátá-rátá Uni Eropa. Bèntenipun jumlah wargi negari-negari Uni Eropa ingkang sampun pikantuk vaksin jangkep taksih njomplang, kados Malta sampun 84%, Bulgaria nembé 16%.
Pusering Pananggulangan lan Pangreksan tumrap Penyakit Lelárá Eropa (ECDC) ingkang nyerat data wargi ingkang pikantuk vaksin. Sadèrèngipun dinten Selásá pangrèh kaséhatan Afrika (CDC) ngaturaken bilih mangké wonten ing akhir taun puniká sakirangipun 25% wargi Afrika badhé pikantuk vaksin jangkep Covid-19. Dugi dinten sapuniká taksih nembé 1,3%.
Wajib Kartu Ijem
Kabar saking Italia, sawetawis puniká wargi ing mriká wiwit tanggal 5 Agustus wajib nedhahaken green pass (kartu ijem) menawi badhé mlebet muséum, rèstoran, konsèr, stadion, minongká bukti bilih sampun pikantuk vaksin, makaten serat kabar Italia La Repubblica dinten Kemis.
Pamréntah Italia ngetrapaken kode warni per wilayah ingkang dipuntemtoaken miturut jumlah opname ing griyá sakit lan intensive care (IC). Per kode warni ngemu aturan piwatesan piyambak-piyambak. Kanthi pranatan énggal puniká wargi ingkang sampun pikantuk vaksin jangkep saget ngraosaken kamardhikan, ugi menawi piyambakipun mlebet wilayah-wilayah ingkang taksih mbebayani.