DEN HAAG – Cacahipun 81% rèsponden ing Walandi ngarsaaken vaksin Pfizer, ingkang paling boten dipunkarsáaken inggih puniká AstraZeneca.
Makaten kasilipun panelitian pratingkah kawulá Walandi babagan vaksin Corona déning Rijksinstituut voor Volksgezondheid en Milieu/RIVM (Lembaga Nasional Kaséhatan lan Lingkungan) lan GGD ingkang dipunbabaraken dinten Jemuah (21/5/2021).
Kathahipun saking 55.500 rèsponden panelitian manawi pikantuk layang giliran suntik vaksin 81% matur ngarsaaken badhé milih vaksin Pfizer/BioNTech, 74% milih Moderna, éwodènten 66% milih vaksin Janssen, lajeng ingkang paling sakedhik 53% karsá dipunsuntik nganggé AstraZeneca.
Ongká-ongká puniká boten tegesipun prosentase kantunanipun boten karsá dipunsuntik nganggé vaksin wau. Sebagéan rèsponden matur taksih ragu-ragu. Sawetawis prosèntase ingkang boten ngarsaaken vaksin katemtu paling kathah vaksin AstraZeneca (28%), paling sakedhik Pfizer (11%).
Miturut rèsponden vaksin Pfizer lan Moderna paling èfèktif utawi manjur lan paling sakedhik èfèk sampingipun.
“Kasunyatanipun pangayoman sedáyá vaksin tumrap penyakit nemen sasampunipun katularan Covid-19 kirang langkung sami (langkung saking 85%),” makaten RIVM.
Salajengipun rèsponden paling sakedhik ajrih pikantuk èfèk samping saking Pfizer (23%), Moderna (25%), Janssen (34%), lan paling inggil AstraZeneca (45%).
Vaksin AstraZeneca lan Janssen dipungathuk-gathukaken kalih èfèk samping ingkang lángká sanget ingkang ndadosaken kakirangan trombosit kaseling kalih rah njèndel. Sarèhning èfèk samping ingkang lángká puniká pramilá ing Walandi vaksin AstraZeneca namung dipunparingaken kanggé yuswá 60+. (es/es)