DEN HAAG – Mobil bènsin ingkang pajeng wonten ing Uni Eropa dugi kwartal kaping tigá namung kantun 39,5%, diesel 17,6%, sanèsipun sampun listrik utawi hibrida.
Sadéan mobil bènsin lan diesel mrosot tikel-tikel prosèn, makaten data statistik Association des Constructeurs Européens d’Automobiles (Paguyuban Pabrik Mobil Eropa) dinten Jemuah (22/10).
Ongká presisipun statistik sadéan mobil énggal ACEA wekdal kwartal kaping tigá (Q3) tahun puniká: mobil bènsin 39,5%, mobil diesel 17,6%, mobil listrik 9,8%, mobil listrik hibrida 20,7%, mobil plug-in hibrida 9,1%, mobil gas alam 0,4%, sanèsipun 2,9%.
Utaminipun wonten ing Jerman lan Prancis, sadéan merk-merk ageng ingkang pajeng kathahipun mobil listrik utawi sebagéan listrik. Éwodènten sadéan mobil bènsin lan diesel ongkanipun anjlok dugi sepalih.
Sawetawis wau wonten ing tanah Walandi mobil hibrida lan plug-in hibrida langkung laris. Mobil diesel sangsáyá dipuntilaraken, sawilayah nasional Walandi mobil diesel ingkang pajeng namung 15 iji.