AMSTERDAM – Pamréntah kutháprájá Amsterdam netepaken pranatan bebáyá ngadhépi Ajax méh juara bal-balan eredivisie kaliyan kahanan pandemi.
Makaten dipunaturaken walikuthá Amsterdam Femke Halsema sasampunipun rembugan kaliyan Openbaar Ministerie (Kajeksan) sáhá pulisi, kados katerangan ingkang dipuntampi javaanseblad dinten Jemuah (30/4/2021).
Pranatan puniká maringi pulisi wewenang kanggé ngglédhah párá kawulá babagan mercon, gaman, sáhá alkohol. Éwodènten ngunjuk utawi ngastá wungkusan gendul alkohol sampun mbiká utawi taksih nutup sedáyá wau dipunlarang ing wilayah kuthá kanggé dinten Ngahad.
Ajax dinten Ngahad bénjing bakal tandhing kalawan FC Èmmen lan cekap mbetahaken biji satunggal kanggé ngrebut titel juara bal-balan eredivisie. Kados tandhing eredivisie sanèsipun ing dinten pungkasan minggon samangké párá suporter ugi boten kénging rawuh nonton ing stadion.
Pulisi sampun mrétungaken bilih párá suporter bakal tumplek blek ngriáyá ing margi-margi sáhá alun-alun menawi Ajax dinten Ngahad mangké juara lan kadosipun bakal ngganggu tátá tentrem umum.
Ing Leidseplein, alun-alun pusering kuthá, sampun dangu wonten larangan alkohol, semanten ugi ing Wallen, Nieuwmarkt, Dam, Rembrandtplein, Westermarkt, Lindengracht, Westerstraat sáhá Noordermarkt. Sarèhning wonten pranatan bebáyá, pramilá ing Leidseplein lan saputeranipun boten kénging sadéan utawi ngastá unjukan alkohol.
Pamréntah kutháprájá Amsterdam wanti-wanti bilih pranatan Corona taksih tetep kanggé lan bilih ongká panularan Corona ing salebeting kuthá taksih nguwatosaken sanget. Sinten nerak sedáyá pranatan wau saget pikantuk dendhá lan pulisi saget tumindak tumrap sinten kémawon ingkang ngganggu katentreman. (es/es)