SEMARANG – Tahun 1935 regi andhuk impor saking Holland mlesat inggil amargi wonten ordonansi utawi pranatan kuota.
De Volksraad (DPR jaman Hindia-Walandi, red) sampun nampi rancangan ordonansi utawi pranatan babagan impor andhuk saking Holland. Kuota dipunlajengaken.
Ningali kahanan bilih pranatan impor andhuk ingkang sapuniká kados kaserat ing Invoerverordening Badhanddoeken 1935, Staatsblad No. 171 (Pranatan Impor Andhuk Tahun 1935, Lembaran Negari No. 171) badhé daluwarsá mangké tanggal 17 Maret, pramilá dipunkarsaaken rancangan wau kedah sampun dipuntetepaken dados ordonansi sadèrèngipun tanggal 16 Maret.
Adhedhasar kasil saking periode kapungkur ingkang saget dipunprakiraaken dugi 10 sasi, makaten kateranganipun, pramilá jángká wekdal wau mathuk kalih punápá ingkang dipunkarsaaken.
Kados katingal saking risalah ingkang ngatur regi kulakan tingkat agèn sadèrèngipun lan salebeting kuota andhuk ingkang paling dipunkarsaaken konsumèn, regi andhuk saking Walandi puniká langsung mlesat inggil.
Mindhakipun regi andhuk saking Walandi puniká boten dipunsebabaken déning pabrikan ing tanah Walandi, nanging amargi impor andhuk saking Walandi puniká nganggé prajanjian komisi, tegesipun regi sadéanipun saking pabrikan lajeng ingkang ngastá konsinyasi pikantuk komisi.
Miturut konvensi ing perkawis komisi dedagangan inggih puniká pabrikan dhawuh dumateng agènipun supados nyadé barang tumrap regi ingkang sasaé-saénipun, kanthi wates minimum ongkos produksi saking pabrikan.
Sarèhning regi andhuk kualitas inggil sadèrèngipun wonten aturan kuota langkung andhap tinimbang ongkos produksi, pramilá pabrikan nampi ndhèrèkaken regi pasar miturut agèn tinimbang kécalan pasar. Akibatipun impor andhuk Holland tahun-tahun kapungkur mboten ndamel pabrikan bathi.
Wontenipun pranatan kuota dugi dinten sapuniká saget ngowahi kahanan wau, saget ndamel regi langkung saé. Éwodènten panetapan kualitas ing sasi-sasi kapungkur kabuktèn langkung inggil tinimbang reginipun, utaminipun tumrap andhuk saking Holland ingkang reginipun mindhak paling kathah.
Ningali panetapan Artikel 3 “Crisisinvoerordonnantie 1935” (Staatsblad No. 349) utawi Pasal 3 Pranatan Krisis Impor Tahun 1935 (Lembaran Negari No. 349) pramilá kuota puniká badhé dipunlajengaken nganggé pranatan khusus, ingkang sampun dipuntetepaken mawi ordonansi puniká.