BRUSSEL – Sakirangipun 20.000 dhaharan anget saben dinten dipunandumaken déning umat Islam ing Brussel, Belgia.
supados pikantuk berkah saking Gusti Allah
Zakaria Berraadi
Ramadan taun kapengker naliká lockdown kaping sepindhah, Ben Hammou sáhá Addam sareng-sareng ngadegaken organisasi Chicago Back. Organisasi miwiti kanthi 1.200 dhaharan, lajeng nambah dados 20.000. Ingkang pikantuk anduman utawi saget ndhèrèk dhahar puniká sinten kémawon, sedáyá kawulá. Biayanipun sedáyá wau saking sedekah kaum muslimin.
“Sasi Ramadan inggih puniká sasi ténggang raos, lan wontenipun pranatan lockdown ndadosaken ténggang raos wau sangsáyá nemen. Sadèrèngipun ingkang andum dhaharan puniká masjid, nanging sarèhning lockdown masjid tutup,” ngendiká Ben Hammou ing De Standaard kados kapethik dinten Ngahad (9/5/2021).
kulá nindakaken puniká atas nami bapak kulá
Belkacem Tsabet
Kirang langkung satunggal kilométer saking panggènan Chicago Back, Souleiman Lihemdi (20), Mohamed El Kandoussi (19) sáhá Zakaria Berraadi (20) ugi sumrikut nyiapaken andum dhaharan. Párá taruná anèm puniká salebeting sasi Ramadan andum 200 dhaharan, antawisipun sup, toyá, kurmá lan sari woh-wohan.
‘Kitá miwiti kanthi sakedhik, nanging ing dinten kaping sapindhah Ramadan sedekah sampun mili piyambak,” makaten El Kandoussi.
“Kathahipun sedekah wau saking párá juragan ingkang dagang ing mriki, ugi saking titiyang saputeran mriki. Puniká tumindak ingkang saé, supados pikantuk berkah saking Gusti Allah,” makaten Berraadi nambahaken.
Sawetawis puniká, Belkacem Tsabet (55) ugi sampun biasa andum dhaharan naliká Ramadan wiwit taun 2007 antawis 600 dugi 1.000 dhaharan saben dinten ing Vierwindenstraat, Molenbeek.
“Kulá nindakaken puniká atas nami bapak kulá, kanggé ngèngeti piyambakipun,” ngendiká Belkacem Tsabet. Organisasini piyambakipun, Ouled Ali, ngemu teges “Putranipun Ali”, inggih puniká nami bapakipun Belkacem Tsabet.
Piyambakipun sareng-sareng kaliyan jurumasak Aziz lan Driss sumrikut masak wiwit siang dugi wanci dhahar buká. Andum dhaharan dipunwiwiti saking garasinipun Tsabet, lajeng keliling saputeranipun wilayah mriká.
Punápá boten lémpoh? “Kulá pikantuk tenágá ingkang boten telas-telas,” makaten Tsabet.