DEN HAAG – Sasi April taun 2021 puniká senaosá kathah sunar suryá nanging sasi paling asrep wiwit 1986. Kanthi suhu rátá-rátá 6,7 derajat, sasi April taun puniká -3 derajat langkung asrep tinimbang April-April taun kapengker.
Miturut weerplaza, wiwit 1986 suhu wanci siang sasi April ing Walandi rátá-rátá 9,9 derajat. Malah tigang taun kapengker suhu rátá-rátá naliká sasi April malah 11 – 12 derajat.
Sasi April taun 2021 puniká asrep sanget amargi pikantuk angin saking lèr, saking Rusia lan Skandinavia ingkang mbetá háwá asrep saking kutub lèr. Padhahal wonten sunar suryá cekap kathah, nggih puniká 224 jam tinimbang rátá-rátá 196 jam sunar suryá ing sasi April taun-taun kapengker, kejawi taun 2020 sunar suryánipun dugi 287 jam.
Sasi April taun 2021 puniká ugi kathah ès lan salju, nanging sakedhik jawoh. Ing bandara Eelde suhu mandhap dugi 0 derajat, dangunipun 18 dinten, padhahal normalipun namung 5 utawi 6 dinten. Sarèhning asrep sanget, ing 10 dinten awal sasi April taun puniká taksih kathah jawoh salju ing tanah Walandi. Padhahal normalipun sampun wanci semi, mélai radi anget kathah sunar suryá.
Sesarengan kalih angetipun suhu alam, lajeng kathah sunar suryá, pramilá alam ing mriki ugi nyambut arupi seminipun tetuwuhan, sekar-sekar ugi ndhèrèk megar tuwuh malih, upaminipun taman sekar tulip ingkang sampun misuwur nggih puniká Keukenhof, ugi ing pinggir-pinggir margi.