WINA – Austria ingkang wekdal sapuniká paling kathah panularan Corona sa-Éropa, nindakaken lockdown dangunipun 10 dinten wiwit dinten Senèn (14/11).
elar, ngelar = verlengen
Kajawi makaten wiwit tanggal 1 Februari 2022 ugi wajib vaksinasi kanggé saben kawulá Austria, sinten dèrèng suntik vaksin Covid-19 bakal dipunwajibaken, makaten Kanselir Alexander Schallenberg ngaturaken kados kapethik saking Algemeen Dablad.
“Bakal wonten wajib vaksinasi nasional. Kitá sampun nyobi nanging boten saget ngeyakinaken cekap kathah wargi supados mundhut vaksin,” makaten Kanselir Schallenberg.
Jumlah wargi Austria ingkang sampun pikantuk vaksin dosis jangkep sapuniká namung 65%. Wiwit dinten Senèn bénjing sinten ingkang dèrèng pikantuk vaksin bakal kénging lockdown sebagéan.
Namung supermarket, apotek lan toko obat ingkang kénging bika. Café, réstoran, lan sekolahan kedah tutup dangunipun 10 dinten. Párá wargi namung kénging medal griyá kanggé blánjá, olahrágá, makaryá utawi tindak dateng dokter.
Sadèrèngipun negari bagéan Salzburg lan Oberösterreich sampun nindakaken pranatan makaten, nanging namung dugi dinten Natal. Puniká wau lockdown kaping 4 ingkang dipuntindakaken déning Austria.
“Kitá boten ngarsaaken gelombang kaping 5,” makaten Kanselir Schallenberg, sinambi dhawuh bilih lockdown 10 dinten saget dipunelaraken wekdalipun langkung dangu, gumantung kaliyan kahanan.
Lockdown puniká dipuntampi kalangan industri pariwisátá Austria kanthi raos awrat, nanging ugi saget mangertos bilih papréntah puniká perlu.
“Pranatan puniká ngantem séktor pariwisátá ing wekdal wiwitan mongsá ski… Kaputusan wau kanthi migatosaken sistem kaséhatan, ugi kanggé nylametaken pariwisátá mongsá winter (mongsá adhem, red) boten saget dipunéndhani,” ngendiká juruwicárá Robert Seeber atas nami séktor pariwisátá.
Miturut Mentri Pangertá Gernot Blümel, ékonomi Austria kirang langkung 15% gumantung kaliyan pariwisátá, kathahipun liburan mongsá adhem kanggé ski lan késahan kuthá. Saben késahan mongsá adhem kanggé ski wonten ing Éropa sepalihipun (50%) milih Austria minongká tujuan. Kawulá Walandi limrahipun remen milih kuthá Tirol, Austria sisih kilèn.
“Pramilá kulá gadhah pangajeng-ajeng mugi-mugi pranatan puniká sakirangipun saget nylametaken sebagéan liburan mongsá adhem wau,” makaten Blümel.
Pamréntah Austria sampun ngénggaraken wekdal mbiyantu omzét ingkang ical naliká pagebluk Corona, kanthi makaten pamréntah saget ngirangi akibat lockdown. Kathahipun wonten atusan juta Euro saben sasi.
Senaosá makaten, menawi pariwisátá mèh Natal mlebet liburan mongsá adhem mangké saget pulih malih, nanging párá juragan hotel ningali kahanan tetep radi peteng.
“Krisis Corona ingkang ngambrá-ámbrá ndadosaken Austria kangèlan,” ngendiká Susanne Kraus-Winkler minongká wakil paguyuban juragan hotel.
“Párá tamu mesthinipun tindak mriki boten namung kanggé paningalan alam ingkang éndah edi peni, nanging ugi amargi raos aman slamet. Liburan klasik wanci Natal kadosipun boten kalap. Paling-paling tamu utami ingkang saget dipunjagiaken,” makaten Susanne Kraus-Winkler. Piyambakipun kagungan pangajeng sasi Januari saget nglajengaken pariwisátá malih.