PEKALONGAN – Babad margi tembus Pekalongan-Banjarnegara dipunwiwiti taun 1939, kathahipun 1.100 dugi 1.200 kawulá makaryá saben dinten damel margi puniká.
Kados sadèrèngipun sampun dipunbabaraken, dinten tanggal 12 Januari wonten ing Buaran dipunwiwiti pakaryan damel margi Buaran dugi Karangkobar. Wiwitanipun pakaryan puniká dipunrawuhi déning párá pangrèhprájá sáhá partikelir, makaten De Locomotief, dinten Senèn 16 Januari 1939.
Miturut pratélan, kanggé pakaryan puniká ugi dipunawontenaken slametan. Sadèrèngipun Bupati Raden Tumenggung Ario Soerjo (jumeneng 1924-1944) mbika kanthi ngaturaken pidato dumateng párá rawuh, antawisipun kados pripun wigatosipun margi puniká kanggé karaharjan párá kawulá.
Bupati ugi maringi wawasan cekak aos riwayat pakaryan puniká, kawiwitan saking Gewestelijke Raad (Déwan Kutháprájá) ingkang pinten-pinten taun kapungkur sampun nggadhahi gagasan damel margi tembus dugi ngidul. Rencana puniká wekdal semanten kepentog kalih ragatipun ingkang awis sanget, ugi kasunyatan bilih wekdal semanten dèrèng saget kepanggih jalur ingkang cocog.
Pamrèntah kabupatèn Pekalongan salajèngipun gotong-royong sareng kabupatèn Banjarnegara maujudaken margi tembus wau dados kasunyatan mawi subsidi saking welvaartsfondsen (bándhá karaharjan), inggih puniká margi sisih kidul dados bagéan garapanipun kabupatèn Banjarnegara.
Bupati Pekalongan mawi pidato puniká ngaturaken matur nuwun ingkang kathah-kathah dumateng pamréntah, ugi dumateng Provinciale Waterstaatsdienst (Dines Pakaryan Umum Provinsi) ingkang sampun karsá makaryá sareng damel margi wau, ngrancang wragad, sáhá sedáyá panyiapanipun, ugi matur nuwun dumateng instansi sanèsipun ingkang sampun ndhèrèk mbiyantu utawi bakal badhé mbiyantu.
Dados kawigatosan antawisipun pinten-pinten jalur sampun dipunpirsani, antawisipun jalur saking Bawang-Bandar-Doro, sarèhning kirang wigatos ugi wragadipun awis sanget, pramilá boten saget kasembadan. Jalur Buaran-Linggo-Paninggaran ingkang badhé dipunleksanaaken puniká ingkang paling cocog.
Kejawi makaten, rintisan margi dateng tanah inggil Kalibening ingkang subur sáhá kecamatan Paninggaran ingkang gemah ripah raharjá bakal dados uwohing pakaryan puniká. Pramilá Bupati dhawuh dumateng párá kawulá ingkang nggarap margi supados makaryá kanthi temen ugi wanti-wanti bilih párá kawulá wau ingkang badhé ngraosaken paedahipun margi tembus Pekalongan-Banjarnegara puniká.
Sareng kalih pandamelan margi tembus wau artá bakal ngglindhing dateng párá kawulá arupi opah buruh lan pambayaran material, sarèhning sedayanipun ndhèrèkaken párá kawulá dhusun piyambak.
Kirang langkung 1.100 dugi 1.200 kawulá badhé dipunrekrut kanggé makaryá saben dinten nggarap margi. Párá kawulá mangsuli pidato Bupati sareng-sareng kanthi jumlegur, “inggih”, lajeng mungel gamelan dados pungkasan pidatonipun Bupati.
Naliká párá kawulá sampun pistá slametan, Bupati lajeng nancepaken sekop ingkang kaping sepindhah minongká pratándhá pandamelan margi tembus Pekalongan-Banjarnegara puniká.