PEKALONGAN – Amargi banjir dinten Jemuah-Setu tanggal 1 lan 2 Februari kajawi kathah kretek dhusun, tanggul, lan pintu toyá ingkang jebol ugi kretek ageng ing margi Limpung-Tersono lan Tersono-Plantungan, saénggá boten saget kanggé miyos lalulintas, makaten Bupati Pekalongan ngaturaken kados kapethik saking Soerabaijasch Handelsblad (18/3/1901).
Sarèhning banjir, sebagéan margi dateng Klidang risak, lajeng margi énggal ing Petungkerep caket halte karétá Roban, kecamatan Subah, ugi margi ageng Doro-Yosorejo, Yosorejo-Pasanggrahan Petungkriono lan Yosorejo-Kayupuning, lajeng margi Lebakbarang-Ketingkrang sáhá Lebakbarang-Karanganyar. Ugi wonten kadadosan siti longsor, saénggá kathah sabin risak lan ancur.
Amargi jawoh deres lan toyá muntab inggil pinten-pinten kretek, margi, tanggul sáhá taneman wonten ing kecamatan Tegal, Brebes, lan Pemalang ugi risak.
Wonten ing kawedanan Lebaksiu (kecamatan Brebes), sabin 5 bouw (bau, red) kaliyan taneman pantunipun lan 3/8 bau sabin tanpá taneman ancur amargi banjir muntaping lepèn Gung, ewodènten margi ageng Jejek nuju Batuagung risak nemen ing pinten-pinten panggénan. Lajeng caket kretek wesi Kumisik malah wonten bagéan margi gompal dowinipun 10 meter wiyaripun 6 meter gigis amargi toyá banjir.
Saking lepèn ageng Kumisik sapuniká klelep banjir boten katingal malih, pintu toyá saking beton lan wesi wájá ugi ancur katerjang watu ageng saking inggil.
Wonten ing distrik Balapulang ugi margi ageng antawis Margasari-Jatibarang lan Margasari Jatibungkus risak langkung nemen katimbang margi sanèsipun, éwodènten lepèn Donowarih ugi jebol.
Salajengipun amargi siti gigis wonten siti tegalan agengipun 60 R.R katut toyá lepèn Gung lan 8 R.R siti kebon tebu gadhahipun pabrik gendhis Kemanglen katut toyá lepèn Cacaban. R.R tegesipun vierkante Rijnlandse Roede utawi Tombak Rijnland persegi inggih puniká pakem ukuran ingkang taksih dipunanggé dugi taun 1937. Kanggé gampilipun kawulá awam nyebat: ukuran tombak.
Ugi amargi siti longsor lan gigis wonten pakebonan kopi ancur, saénggá sebagéan taneman kopi ical muspro, ewodènten wit-witan Albezia ambruk kabedhol dugi oyot-oyotipun jalaran angin kenceng, dados nambah risakipun pakebonan kopi. Sadangunipun sedáyá karisakan wau dèrèng dipundandani, sampun dipunparingaken upákarti kanggé sawetawis wekdal.