BRUSSEL – Sasampunipun lockdown setengah taun, réstoran café téras ing Belgia kénging bikak malih, wiwit dinten sapuniká, Setu (8/5/2021).
Palonggaran puniká dipunaturaken pamréntah Belgia kalih minggu kapengker, sarèhning virus Corona miturut pamréntah sawetawis sampun sirep saénggá nglonggaraken pranatan lockdown saget nggadhahi alesan.
Pamréntah Belgia janipun minggu kálá wingi sampun badhé mundhut pranatan langkung longgar, nanging kuwatos nggègè mángsá lajeng milih ngatos-atos mundur saminggu.
Réstoran café ing Belgia senaosá kantun saminggu nembé kénging bikak tinimbang Walandi, nanging jam bikakipun langkung dangu inggih puniká saking jam 08.00 dugi jam 22.00.
Sadèrèngipun pamréntah namung badhé paring idin bikak dugi jam 20.00, nanging párá walikuthá sáhá párá juragan réstoran café boten saget nampi. Dipunaturaken bilih jam 20.00 párá tamu dèrèng bakal karsá kundur, piyambakipun mesthi kempalan ing panggénan sanèsipun.
Kejawi makaten ugi boten wonten jam malem malih. Sadèrèngipun kawulá Belgia ing Brussel lan Wallonia kénging jam malem saking jam 22.00 dugi jam 06.00. Éwodéné kawulá ing Vlaanderen saking jam 00.00 dugi jam 05.00. Pranatan puniká wiwit 19 Oktober 2020.
Tegesipun wiwit dinten sapuniká kawulá Belgia saget bébas medal griyá wanci dalu malih, nanging tetep kedah migatosaken protokol keséhatan. (es/es)