DEN HAAG – Kathah ingkang dèrèng pirsá bèntenipun sado, délman, bèndi, dokar, glindhing, andhong. Seratan puniká saget mangsuli ugi nambah kawruh.
Sado saking tembung dos-á-dos, tegesipun pengkeran ngadhep pengkeran (ngoko: geger ngadhep geger, adu geger). Kados naminipun, puniká kerétá alit 2 penumpang, penumpang ngadhep wingking, adu pengkeran kalih kusir.
Délman saking tembung Deeleman, ngagem asmanipun insinyur Amsterdam: Charles Théodore Deeleman (1823-1884). Ir. Deeleman ngrancang kerétá langkung ageng saking Sado, saget mbétá 4 penumpang, adhep-adhepan 2-2 sisih kiwá tengen (E. Sanders, 1993); Eponiemenwoordenboek: Woorden die teruggaan op historische personen, Amsterdam).
Ing pinten-pinten panggénan délman puniká dipunwastani bènten-bènten miturut dialèk dhaérahipun, kados ing Batang-Pekalongan: glindhing, éwodènten ing Semarang: andhong, kados kaserat ing tembangipun Didi Kempot “Goyang Semarang” (klinthong-klinthong numpak andhong ngebel klingklong klingklong, grayah-grayah sak’e kosong kanthong bolong…).
Kerétá damelan Ir. Deeleman puniká naté dados waháná angkutan utami ing Indonesia, kalebet Batang – Pekalongan, dugi taun 1980-an, sadèrèngipun sirná kalah kalih kendaraan mesin bèmo, colt damelan Jepang.
Ewodènten bendi saking tembung bendy puniká kerétá alit satunggal penumpang (kalih kaliyan kusir), boten nganggé payon. Naliká jaman Walandi, Jaman Mbah Buyut kálá rumiyin, kerétá puniká asring dipunginaaken déning tuan-tuan tanah pakebonan kanggé mirsani pakebonanipun utawi párá priyantun inggil kekésahan ing dhusun-dhusun.
Kados tembang sekolah “Babendi-bendi (Berbendi-bendi)” saking Minangkabau puniká nitih bèndhi keliling muji kaéndahan alam:
babendi-bendi ka Sungai Tanang, aduhai sayang… singgahlah mamatiak, singgahlah mamatiak bungo lambayuang
Kanthi umum sedáyá kendaraan wau dipunwastani dokar, utaminipun ing básá Jawi. Kados sampun kasebat ing Kacilakan Kali Banger 1932, dokar puniká saking tembung dogcar, lajeng déning lathi tiyang-tiyang pangucapanipun owah dados dokar. Sawetawis ing básá Indonesia kathahipun nganggé tembung délman. (es/es)