Banjir ing Sampang, Surábáyá. Naliká tanggal kaping 23 dumugi tanggal kaping 26 sasi Dhésèmber ingkang sampun kapengker puniká ing Sampang kabanjiran, lampahipun toyá boten kados banjiran ing Surákartá.
Ing Surákartá menawi banjir ilining toyá boten santer, ing Sampang lampahipun toyá anglangkungi santeripun, griyá tuwin barang darbèkipun tiyang pakampungan kathah ingkang larut, uwos ing Pacinan pinten-pinten koyan ingkang boten katulungan kasesá.
Dhatengipun toyá ngagét kémawon, párá sudagar wah para Ciná ingkang sami bikak toko sedáyá sami jenggruk. Saking pakabaran boten ngemungaken ing Sampang kémawon ingkang kabanjiran, ing Bangkalan utawi Sumenep, Pamekasan ugi kabanjiran.
Katandhan pun R.A. Jáká Laloná
Ing ngajeng kulá asring maos serat Bra Martani anggugujeng dhateng ingkang manjurung bab laré guyang kapal sasandèran. Kulá manah saking panastèn tuwin tanpá paédah, ing wasáná sareng dinten Rebo énjing wanci jam 7 sasi Dhésèmber puniká, kulá pinuju kliyek-kliyek anglemesaken suku dhateng radinan ageng.
Boten dangu wonten kapal nyandèr saking kidul kathahipun 5 iji, ingkang numpak sami laré tumambirang, dumugi lèr kulá caket wonten laré alit umur 7 taun saking kilèn sumedyá mangétan ngleresi dhatenging kapal nyandèr wau. Rahayu laré bejanipun ingkang gadhah anak teká boten kapidak amung kalangkahan.
Párá tiyang kiwá tengenipun ingkang sami mirsá sami jerit ngelokaken mati, lo dados leres ingkang atur pepenget ing ngajeng dhateng párá priyantun pulisi supados angambengáná laré guyang kapal sandèran.
Katandhan Masudi (es)