BATANG – Pamrèntah Kabupatèn Batang nggadhahi kekarepan sedáyá dhusun wonten ing wilayahipun saget mlebet pèrangan Dhusun Pinter.
Puniká ngugemi paningal lan dhawuh Bupati Batang Wihaji sáhá Wakil Bupati Suyono nggih puniká program Dhusun Pinter lan Kuthá Pinter ingkang mlebet kekarepan strategis jángká madyá daérah.
Program kasebat wau sayogyanipun sampun dipunkersaaken wonten ing taun 2020, nanging pagebluk Covid-19 ngunduraken program Dhusun Pinter wau ingkang sampun mlebet ing kekarepan jángká madyá daérah Pemrèntah Kabupatèn Batang taun 2020, saénggá Bupati Batang Wihaji dhawuh bilih taun 2021 sedáyá urusan ladènan masyarakat kedah saget rampung ing tingkat dhusun.
“Amargi wonten pagebluk Covid-19 ndadosaken anggaran kekarepan Dhusun Pinter kedah dipunkethok, saénggá ingkang sayogyanipun sampun saget dipunwujudaken taun puniká dados katundhá lan dipunkarepaken malih kedah sampun rampung taun 2021,” makaten Bupati Wihaji naté ngendiká tumrap Tribunjateng.com, dipunwartosaken dinten Rebo (2/9/2020).
Bupati nerangaken bilih Dhusun Pinter puniká landhasanipun teknologi informasi kanthi tujuan nggampilaken layanan dumateng párá wargi nganggé pangkalan data (Database) ingkang manunggal kalih sedáyá instansi lan OPD.
Program Dhusun Pinter ugi bakal saget ningali masalah, mangertosi kahanan dhusun lan ngatur punápá kémawon sumber dáyá ingkang cumawis supados saget dipunginaaken kanthi èfèktif, èfisièn lan gampil, kanggé nginggilaken layanan dumateng párá warginipun.
“Wonten ing jaman digital sapuniká párá wargi mbetahaken layanan ingkang kebat, satiti, cethá, lan gratis, pramilá Dhusun Pinter bakal saget mangsuli sedáyá wau nganggé pangkalan data ingkang manunggal kalih OPD,” makaten Bupati Wihaji.
Sawetárá Kepala Dinas Pambudidáyá Wargi Dhusun Kabupatèn Batang Agung Wisnu Barata ngendiká bilih kanthi program Dhusun Pinter puniká sedáyá urusan saget tlesih ing tingkat dhusun, párá wargi boten usah malih tindak dateng Kecamatan utawi Kantor Seratan Sipil menawi mbetahaken dokumen padunungan.
Bagéan piyambakipun sampun miwiti nindakaken program panglantihan kanggé nyiapaken sumber dáyá manungsanipun ing tingkat dhusun rumiyin.
“Dhusun Pinter taksih kitá siyapaken tiyang-tiyangipun sáhá pirantinipun. Kanggé sumber dáyá manungsanipun kitá tumindakaken taun puniká, piranti atos utawi komputeripun kitá pundhutaken ing taun 2021,” makaten Agung Wisnu Barata. (es)