BATANG – Bupati Batang, Jawi Tengah, Wihaji paring idin sekolah wonten ing wilayah ijem Covid-19 saget nindakaken malih wulang-piwulang adhep-adhepan mangké wiwitan sasi Maret 2021.
“Paring piwulang adhep-adhepan wonten ing sekolah dipunmathukaken kalih kahanan panyebaran Covid-19 utawi ingkang kalebet wilayah ijem Covid-19,” ngendiká Bupati Wihaji kados dipunpethik saking Kompas (24/2).
Bupati Wihaji maringi conto bilih panyebaran Covid-19 wonten ing dhusun Gerlang lan dhusun Prantèn, Kecamatan Bawang, Kabupatèn Batang, kaserat nul kasus. Pramilá sekolah ten dhusun kekalih wau dipun aturi saget ngawontenaken malih piwulangan adhep-adhepan.
“Kulá mbayangaken satunggal taun kapengker puniká wonten masalah ingkang kulá kinten badhé mengaruhi ngguláwentahing karakter bongsá kitá,” makaten Bupati Wihaji.
Bupati Wihaji kagungan jalaran piwulangan adhep-adhepan dipunawontenaken malih amargi kathah alangan ingkang dipunpanggihi naliká pangetrapan piwulangan saking tebih utawi pembelajaran jarak jauh (PJJ).
“Kulá boten saget mbayangaken guru-guru ingkang tugas mulang wonten ing Prantèn lan Gerlang, wong madosi sinyal mawon angèl,” Bupati Wihaji nambahaken.
Kanggé nyegah wontenipun klaster énggal Covid-19, miturut Bupati kegiatan sekolah adhep-adhepan kedah ndhèrèkaken aturan ingkang sampun dipunsyarataken.
“Kulá nyuwun Pak Kadis Pendidikan lan Kabudayan ndamel standar prosedur, ndamel serat katerangan nganggé materai dipuntapakastani déning tiyang sepuh lan pengawas sekolah, saénggá piwulangan adhep-adhepan boten ndadosaken masalah ten wingking dinten,” makaten Bupati Wihaji. (es)