DEN HAAG – Kabinèt kempal dadakan dinten Kemis ing Catshuis, dalem resmi Perdana Menteri, boten tebih saking KBRI Den Haag, ngrembag pitedhah saking Outbreak Management Team (OMT) babagan Corona ingkang muntab malih.
Ugi dinten Kemis wau RIVM ngaturaken lapuran kathahipun tès positif sedinten mlesat wonten 16.000, paling kathah dugi wekdal sapuniká. Ingkang sadèrèngipun ongká makaten boten dados rembagan mundhut aturan kenceng, kabinèt demisionèr sapuniká mangu-mangu.
Dhawuh Menkes Hugo de Jonge ing Twitter, “Kanggé panjenengan piyambak, tiyang-tiyang saputeran panjenengan, kanggé njagi kamardhikan ingkang sampun karebut malih”
Párá menteri naliká rapat alot dugi Kemis dalu wonten ing Catshuis wau boten saget sarujuk tumrap pitakènan punápá pranatan kados lockdown sapuniká cocog, saget dipuntampi?
Kemis dalu sanget, sumber NOS (puniká stasiun panyiaran publik kados BBC, red) ngaturaken bilih pungkasanipun toh saget sarujuk perkawis lockdown, nanging lockdown sebagéan utawi semi-lockdown (boten total) tur dangunipun cekap 3 minggu.
Antawisipun horéca (hotèl, réstoran, café) lan toko-toko ingkang boten wigatos (bahan pokok) kedah tutup jam 19.00. Dipunprakiraaken dinten Jemuah sapuniká kabinèt sampun saget mundhut kaputusan, lajeng Jemuah dalu coronapersconferentie (konferènsi pers babagan Corona, red).
Sadèrèngipun dinten Kemis énjing sampun bocor pirembag saking OMT ingkang sampun rapat dinten Rebo bilih kedah wonten pranatan langkung teges kenceng kanggé ngirangi panularan ingkang sapuniká muntab malih.
Pirembag saking OMT wau dèrèng resmi dipunbabaraken, nanging párá ahli kadosipun sampun paring pirembag dateng kabinèt antawisipun menggalih supados ngirangi wekdal bika restoran, café, lan toko-toko ingkang sanès kabutuhan pokok, ugi nutup teater, bioskop, lan tontonan ramé-ramé dangunipun pinten-pinten minggu.
Pirembag saking OMT dipunprakiraaken bakal langkung teges, kenceng, makaten sumber saking lebet kabinèt. Kawiwitan minggu puniká kalangan kabinèt taksih nyepengi pangajeng-ajeng bilih opname ing griyá sakit saget mandhap, nanging kasunyatanipun jebul boten makaten.
Ugi dipunpangajengaken bilih pitedhah babagan pratingkah saking konferènsi pèrs minggu kapungkur, kados dhawuh supados tetep njagi let 1,5 mèter, saget nggadhahi èfèk, nanging panelitèn RIVM minggu kapungkur nedhahaken bilih masyarakat boten peduli pitedhah ingkang sampun bolan-balèn. Kejawi makaten ugi kabuktèn bilih kontrol kartu Corona ing pinten-pinten panggènan boten melampah kados dipunkarsaaken.