Wargi kuthá Den Haag taun puniká kalih taun ngajeng saget pikantuk winih tetuwuhan gratis saking pamréntah kutháprájá. Pamréntah kanthi program puniká ngersaaken kuthá sangsáyá ijem, ijo royo-royo.
“Den Haag salah satunggaling kuthá ten Walandi ingkang kathah bangunan beton. Pramilá kanthi program puniká kitá saget paring sumbangsih kanggé ndamel kuthá tambah éndah, sekécá, lan saget ngadhepi dampak owahing iklim,” ngendiká Arjen Kapteijns, ketua fraksi Groenlinks.
Kuthá Den Haag jané sampun misuwur minongká kuthá ingkang asri ijo royo-royo, nanging taksih wonten panggénan ingkang taksih kirang makaten. Ugi kuthá internasional puniká salah satunggaling kuthá ingkang paling pepak warginipun lan ten taun-taun ngajeng bakal tambah malih.
“Sampun wancinipun nambah tetuwuhan,” makaten Kapteijns.
Nanging ten wiwitanipun program puniká angèl dipunlaksanaaken, amargi ambanipun tanah kuthá Den Haag namung separuh mawon ingkang kagunganipun pamréntah, lan ten tanah wau sampun boten kathah ingkang saget dipuntanemi, sampun kecaplok kanggé parkiran, trotoar, lan panggénan wadhah larahan.
Pramilá pamréntah ngrangkul swasta kanthi maringi tetuwuhan gratis, kalebet swasta puniká antawisipun párá wargi, paguyuban lan perusahaan.
“Saénipun nanem tetuwuhan ten tanah kagungan swasta nggih puniká lumrahipun tebih saking margi ageng lan langkung jembar, saénggá saget tuwuh langkung saé lan langkung dangu,” makaten Kapteijns.
Den Haag piyambak wekdal sapuniká sampun nggadhahi 120.000 tetuwuhan ten tengah-tengahing kuthá. Kanthi program puniká dipunkarepaken nambah malih 600 tetuwuhan saben taun.
“Kedah saget,” makaten Kapteijns.