DEN HAAG – Kutháprájá Den Haag boten paring idin malih tumrap réklame produk ingkang wonten kaitanipun kalih bahan bakar fosil.
Aturan énggal puniká minongká kasil saking mosi ingkang dipunaturaken déning Partij voor de Dieren ing Gemeenteraad (DPRD) kutháprájá Den Haag. Kathahipun 23 suanten paring dukungan, 20 suanten nentang mosi puniká, makaten kapethik saking siaran Omroep West, dinten Jemuah (8/10).
Kalebet réklame ingkang dipunlarang inggih puniká sedáyá produk otomotif nganggé bahan bakar fosil kados bènsin lan diesel, ugi rèklame airlines utawi liburan nganggé montor mabur, sarèhning waháná puniká kathahipun taksih nganggé bahan bakar fosil.
Éwodènten panggènan ingkang dipunmaksud inggih puniká halte tenggá bis lan tram, saénggá réklame-réklame produk nganggé bahan bakar fosil wau ical saking pasawangan kuthá lan wigatosan párá wargi Den Haag.
Sapuniká Metropoolregio Rotterdam Den Haag (MRDH) utawi Wilayah Metropolitan Den Haag Rotterdam sampun miwiti prosedur tènder énggal kanggé gangsal taun majeng per sasi Oktober puniká.
Jalaranipun amargi krisis iklim ingkang ndorong Partij voor de Dieren ngaturaken mosi wau.
“Kanggé nanggulangi owahipun iklim kitá kedah marèni nganggé batubara, lengá, lan gas bumi. Minongká jangkah kaping sepindhah inggih puniká boten kénging wonten réklame malih kanggé produk-produk wau,” makaten pangajeng fraksi Robert Barker tumrap Omroep West.