DEN HAAG – Kulit astá abrit tur gatel-gatel? Sarèhning asring nyuci astá, kulit astá dados garing, saget kénging èksém ingkang lajeng saget mrèmbèt.
Dermatolog (dokter spesialis kulit) Gertruud Krekels mangertos bilih sedáyá wau ketingal anèh. Kados ketingal anèhipun bilih langkung saé nyuci astá nganggé dèsinfektan alkohol ingkang ketingalipun agrèsif tumrap kulit.
“Alkohol malah kirang ndadosaken kulit garing tinimbang toyá,” makaten Gertruud Krekels.
Krekels sapuniká makaryá ing MoshA, satunggaling klinik spesialis kulit ing kuthá Eindhoven, kalebet bagéan saking Radboudumc kaliyan TU/e kanggé panelitian.
“Kulit dados garing amargi toyá lan sabun, lajeng dados abrit, bencirih tur ringkih. Utaminipun sapuniká kitá langkung asring tur dangu kedah nyuci astá, pramilá kedah ngrumat kulit astá kanthi temen. Cekap nganggé handcrème,” ngendiká Krekels.
Miturut Krekels, kirang langkung 10% kawulá Walandi gampil kènging handeczeem, èksém ing bagéan astanipun. Ngirangi nyuci astá sanès pilihan. Piyambakipun maringi pitutur bilih nganggé alkohol malah langkung saé, boten nyebabaken kulit énggal garing, utaminipun alkohol spray (semprot).
“Pengalaman mbuktiaken bilih nganggé alkohol kontak kulit astá langkung cepet, sawetawis nyuci nganggé toyá lan sabun langkung dangu, gampil dadosaken iritasi lajeng kénging èksém,” makaten Krekels.
Piyambakipun wanti-wanti bilih èksém ing astá ugi gampil mrèmbet, utaminipun tumrap panggènan-panggènan kulit ingkang tipis saputering socá lan daérah jonggá.
“Énggal mrèmbèt dateng bagéan-bagéan sanèsipun ing badan panjenengan, utaminipun panggènan kulit ingkang tipis, antawisipun saputering socá lan daérah jonggá. Selá-selá kulit ingkang dados kasar amargi èksém ugi gampil ketèmpèlan baktéri lan jamur,” Krekels nerangaken.
Nyegah langkung saé tinimbang ngobati, dados sadèrèngipun iritasi kulit lajeng kènging èksém, Krekels maringi pitutur supados saben dalu mèh saré kedah mborèhi astá nganggé handcrème utawi cetomacrogol, saget mundhut ing toko obat utawi apotik.
“Ampun nganggé vaseline, sebab vaseline lèngkèt nilaraken bekas,” makaten Krekels. (es/es)