HILVERSUM – Eduard Cousin, korèspondèn ing Kairo, Mesir, mlebet Islam, ningkah kalih wanitá Mesir, nyariosaken babagan tradisi kuliner Ramadan ing Mesir, lan pripun kahanan kuthá Kairo salebeting Ramadan.
“Kairo saèstu normalipun kuthá 24/7 (tegesipun siang dalu boten naté sepen, red), satunggaling kuthá ingkang tansah ramé boten naté mandheg. Nanging wanci Ramadan menawi siang anteng, kuthá Kairo dados kalem kanthi tempo ingkang bènten, lajeng minggah ramé malih setengah jam sadèrèngipun maghrib lan satunggal jam sasampunipun. Wekdal semanten lajeng sedáyá sinten kémawon lenggah dhahar,” ngendiká Eduard Cousin ing Mangiare, siaran NPO Radio 1.
“Salajengipun gesang wargi Kairo normal malih dugi dalu lan kahanan njawi griyá ramé sanget boten kinten-kinten. Nanging wanci iftar (dhahar buká, red) biasanipun dhahar ing griyá sareng-sareng kaluargi. Lajeng menawi sahur tiyang-tiyang mriki langkung remen dhahar ing njawi griyá, pramilá restoran-restoran mesthi kebak ramé,” makaten Cousin.
Miturut Eduard Cousin, kanggé saliranipun piyambak ing Kairo iftar puniká minongká wekdal kanggé sareng-sareng dhahar ing griyá kalih kaluargi lan mesthi dhaharanipun komplit rupi-rupi warni.
“Sedáyá punápá kémawon dipunsaosaken ing méjá: daging bèbèk, mendhá utawi lembu, rupi-rupi sayuran khas kulinèr Mesir kados mashi(sayur isi, red), sup molochia, sáhá dolma (godhong anggur isi, red),” ngendiká Eduard Cousin.
Ramadan dangunipun sesasi miturut pananggalan rembulan, ingkang étanganipun langkung cekak tinimbang pananggalan srengéngé. Sesasi cacahipun 28/29 dinten.
“Siyam Ramadan sesasi pancèn dangu, nanging saben dalu wonten iftar, lan puniká ugi wekdal sosial ten pundi tiyang-tiyang sami kempal kalih kaluargi lan réncang-réncang,” makaten Eduard Cousin.
Jurnalis kulinèr Hassnae Bouazza matur bilih ing Walandi iftar taun-taun kapengker dipunwiwiti langkung dalu tinimbang ing Timur Tengah.
“Sarèhning ing mriká srengéngé langkung énggal mlingsep. Nanging Ramadan wekdalipun tansah nggèsèr lan dhawahipun tansah majeng, dados satunggaling dinten siyam bakal langkung gampil, sebab Ramadan bakal dhawah ing wanci mongsá adhem,” makaten Bouazza.
Miturut Bouazza, camilan sarwá manis biasa dipunaturaken naliká Ramadan. Nanging wonten bèntenipun antawis camilan manis kanggé iftar, ingkang dipundhahar saben dinten naliká buká kalih camilan manis naliká Idul Fitri ing pungkasanipun Ramadan.
“Naliká iftar wonten ing pungkasan dinten Ramadan biasanipun dhahar camilan ingkang dipuntelesi nganggé madu, kados brewat lan shebekkia. Wonten ing pungkasan Ramadan, naliká Idul Fitri, biasanipun dhahar rupi-rupi jajanan ingkang dipuntátá sarwá éndah, antawisipun nganggé pistache,” makaten Bouazza.