DEN HAAG – Saben taun wekdal ing mriki Eropa majeng satunggal jam utawi mundur ugi satunggal jam, inggih punikà naliká mlebet Wanci Adhem (Winter, Musim Dingin) lan Wanci Bentèr (Zomer, Musim Panas).
Kapan mlebet wekdal Wanci Adhem? Inggih puniká bénjing dinten Ngahad tanggal 31 Oktober 2021, wekdal badhé mundur satunggal jam saénggá wanci siang langkung cekak, énggal peteng satunggal jam, aliasipun wanci dalu langkung dowi. Presisipun mangké dalu jam 03.00 mundur satunggal jam dados jam 02.00.
wiwit dinten Ngahad 31 Oktober 2021 wekdal Amsterdam – Jakarta dados kaot 6 jam
Wekdal Wanci Adhem puniká dangunipun 5 sasi, saking dinten Ngahad pungkasan sasi Oktober bénjing dugi dinten Ngahad pungkasan sasi Maret, saben taun makaten. Tegesipun mangké dinten Ngahad 27 Maret 2022 gantosan mlebet Wanci Bentèr, wekdal dados majeng satunggal jam, presisipun jam 02.00 dados jam 03.00, wekdal dalu dados langkung cekak, wekdal siang langkung dowi padhang jembrang.
Wekdal-wekdal ingkang kapungkur sampun kathah dipuntindakaken babagan owahing wekdal saben taun puniká, jalaran Komisi Eropa sampun ngaturaken rancangan bilih negari-negari anggota Uni Eropa saget netepaken piyambak pakem ingkang pundi ingkang karsá dipuntindakaken: pakem wekdal Wanci Bentèr punápá Wanci Adhem.
Dugi dinten sapuniká owahing wekdal wau tetep kadadosan saben taun lan taksih tetep dados pitakènan. Wekdal wanci pundi ingkang temen, sanyátá? Inggih puniká wekdal Wanci Adhem. Éwodènten wekdal Wanci Bentèr puniká dipuntemtoaken kanggé ngirit ènèrgi.
Sarèhning saben taun jam majeng mundur naliká mlebet Wanci Adhem lan Wanci Bentèr, párá wargi kadhang kálá ugi bingung mlebet wanci pundi jam kedah majeng lan wanci pundi jam kedah mundur. Karsanipun boten bingung utawi supé milá saget cepengan paugeran puniká:
Menawi badhé mlebet wekdal Wanci Adhem mesthi Fall (Wanci Gugur), de klok valt achteruit (jam dhawah wingking), tegesipun mundur satunggal jam. Menawi badhé mlebet wekdal Wanci Bentèr mesthi Spring (Wanci Semi), de klok springt vooruit (jam mlompat majeng), tegesipun majeng satunggal jam. Makaten, mugi saget mbiyantu.