DEN HAAG – Erik van Z., ingkang ngancem mentri Sigrid Kaag mawi Facebook pikantuk vonis 5 sasi bui, pracoban 2 sasi. Ing pangadilan piyambakipun ngakèni keduwung.
Het Openbaar Ministerie (Kajeksan) nuntut bui 4 sasi. Ing dinten tanggal 30 September Van Z. masang anceman dateng mentri Kaag ing Facebook nganggé profil palsu.
“Kanthi puniká kulá ngaturaken bilih kulá badhé nyerang Sigrid Kaag dalu puniká sadèrèngipun jam 24.00 lan badhé natoni piyambakipun dugi pejah utawi boten saget nindakaken malih tugasipun,” makaten seratan Van Z.
Kalih minggu sadèrèngipun piyambakipun ugi sampun ngancem Menteri Kaséhatan Hugo de Jonge mawi Facebook. Menteri Kaag langsung damel lapuran datang pulisi.
“Kulá ngraos ajrih … sarèhning kulá namung manungsá. Menawi wonten tiyang badhé mejahi panjenengan, pramilá panjenengan bakal menggalih: sepinten kulá taksih saget aman? Sepinten amanipun garwá lan laré-laré kulá?” makaten Menteri Kaag.
Van Z. puniká tiyang jaler wargi Walandi yuswá 43 taun, gegriyá ing Spanyol. Piyambakipun anti pranatan Corona ingkang dipunyindakaken déning pamréntah Walandi lan boten kersá dipunsuntik vaksin, ngendiká advokatipun. Van Z. matur bilih piyambakipun nyerat anceman wau kanthi kesesá.
“Naliká semanten nesu, mboten menggalih, lajeng nyerat ing Facebook. Sapuniká kulá lenggah ing mriki (ing ngarsaning hakim). Menawi kulá ngertos sedáyá akibatipun… Kulá lingsem jero sanget. Kulá keduwung, gelo sanget…,” makaten Van Z.
Advokatipun Van Z. ngaturi pirsá bilih piyambakipun kadosipun boten badhé minggah bandhing.