DEN HAAG – Satunggaling gunem-takèn antawis jurnalis wanitá Amérika lan Présidèn Vladimir Putin (69) ndamel gègèr negari Rusia.
Miturut pinten-pinten media pamréntah, jurnalis wanitá media Amérika CNBC nggih puniká Hadley Gamble tingkah polahipun kados ‘obyèk sèks’ lan nyobi nggodhani Presidèn Putin mawi pasuryanipun ingkang ayu.
Putin piyambak ngendiká bilih Gamble, jurnalis wanitá wau, kebangeten ayunipun kanggé mangsuli pitakènan. Gamble (39) piyambak namung saget gemujeng sasampunipun pirsá gègèran puniká.
Gunem-takèn antawis Gamble lan Putin kalampahan minggu kálá wingi naliká kempalan kongrès internasional The Russian Energy Week ing Moskow. Saking gambar-gambar ingkang nyebar katingal cethá kados pripun Putin asring nyawang jurnalis Amérika wau.
Miturut media pamréntah Rusia, Gamble puniká nggadhahi maksud awon. Miturut komentator Dmitry Kiselyov, piyambakipun nedhahaken prilaku kebablasen lan nyawang Prèsidèn kanthi nggodhá. Kiselyov, misuwur minongká ‘corongipun Poetin’ ngendiká bilih jurnalis wanitá Amérika wau mprovokasi nggerak-nggerakaken samparanipun ingkang wudá.
Párá kritikus ngendiká bilih Gamble ugi nyengájá dolanan rikmanipun sáhá lathinipun.
Piyambakipun ngagem rok sesek mlethet, ngibas-ngibasaken rikmanipun ingkang ngombak lan ngagem sepatu Louboutin ingkang ndamel samparanipun ketingal langkung janjang dowi. Samparanipun kinclong-kinclong nggodhá kaborèh lisah sarirá, kados boten taksih makaryá.
Tumindakipun jurnalis wanitá Amérika wau miturut media pamréntah Rusia minongká mbales insidèn ing taun 2019 naliká Présidèn Putin mbetá juru terjemah Rusia ingkang ayu merak ati kanggé mengaruhi Donald Trump, prèsidèn Amérika wekdal semanten.
Babagan puniká ugi kaserat ing bukunipun Stephanie Grisham, manten juruwicárá Gedhong Pethak (White House).
Gamble piyambak namung saget mésam-mèsem mirsani gègèran wau. Wonten ing Instagram piyambakipun andum foto ingkang cethá ketingal piyambakipun ngastá serat kabar Rusia mawi foto piyambakipun dados headline. “My best angle (sisih kulá ingkang paling saé),” serat Gamble, dipunjangkepi nganggé hashtags #feminism #russia