DAVOS – Gusti Kanjeng Ratu Máxima ngrawuhi World Economic Forum (WEF) ing Davos, Swiss (24-25 Mei). Ratu antawisipun ngendikan bilateral kaliyan párá wakil pamréntah, swastá, organisasi pambangunan internasional, ugi ngrawuhi sidang-sidang pléno.
Gusti Kanjeng Ratu Máxima rawuh minongká advokat khusus Sekretaris Jénderal PBB babagan Bebrayan Pambiayaan kanggé Pambangunan (UNSGSA), makaten Rijksvoorlichtingsdienst mawi serat pawartá ingkang dipuntampi Het Javaanse Blad.
Salah satunggaling dhawuh Ratu ingkang paling wigatos inggih puniká layanan pambiayaan digital kanggé ndorong pambiayaan ingkang séhat sáhá mbangun ékonomi. Pandemi Corona sampun nedhahaken pripun wigatosipun párá kawulá saget pikantuk layanan pambiayaan digital. Salajengipun babagan kados fintech bebrayan sáhá pambiayaan bebrayan ijem ugi mlebet agénda.
Dinten Selásá, 24 Mei, Gusti Kanjeng Ratu Máxima ngendikan dateng acárá ‘Financial Inclusion: Addressing the Largest Gaps’ perkawis punápá mawon ingkang dipunbetahaken supados pikantuk bebrayan pambiayaan sáhá inovasi-inovasi ingkang saget mbiyantu.
Sapuniká cacahipun wonten 1,7 milyar tiyang déwásá sadonyá ingkang dèrèng gadhah rékening bank utawi rékening simpenan, asuransi, ampilan, pensiun, ugi bebayar digital. Kathahipun tetiyang ingkang alit gajinipun, párá wanitá, sáhá párá juragan (tani) alit (Global Findex 2017).
Naliká sarasèhan Mastercard, ‘Rules of the Road for the Digital Economy’, Gusti Kanjeng Ratu Máxima ngaturaken babagan risiko-risiko bias algoritma. Lajeng piyambakipun salebeting sèsi ‘Unlocking Capital at Scale for Digital Inclusion’ ugi dhawuh babagan nggerakaken pawitan séktor swastá kanggé ndorong invèstasi ékonomi digital. Sesi puniká dipunaturaken déning Edison Alliance.
Dinten Rebo, 25 Mei, Gusti Kanjeng Ratu Máxima ngawontenaken rembagan sareng CEO Partnership for Economic Inclusion. Kamitran informil puniká ngembangaken proyèk-proyèk kanggé sumbangsih ndamel layanan pambiayaan langkung saé dumateng párá klièn, kathahipun párá juragan alit.
Gusti Kanjeng Ratu Máxima sapuniká anggota UNSGSA, ugi Stewardship Board of the World Economic Forum. Kejawi makaten wiwit 2021 piyambakipun ugi jumeneng dados anggota Edison Alliance. Prakarsá World Economic Forum puniká wau kanggé ndorong bebrayan digital ing babagan keséhatan, layanan pambiayaan, sáhá pendidikan (es/es).