BATAVIA – Kabar saking Semarang ngemu katerangan bilih Gubernur Jenderal sáhá garwanipun Baronnesse van der Capellen sasampunipun pinten-pinten dinten mandheg ing Tegal lan Pekalongan saking mriká sampun dugi kanthi wilujeng dinten Kemis tanggal 29 Juli kapengker, lajeng ing dinten tanggal 15 sasi puniká (Agustus) nglajengaken malih tindakanipun dhateng Surákartá lan Ngayogyákartá, makaten Arnhemsche Courant, Selásá (25/8/1820).
Dugi dinten sapuniká ten pundi-pundi panèn mludag, ugi ketingal pantun ingkang taksih ing sabin bingahaken manah. Sarèhning kahanan puniká párá kawulá pribumi sami anteng tentrem, pikantuk paedah saking pranátá pamréntah, éwodènten kathahipun kasil panèn ingkang sampun sedyá dipunsadé sáhá mludagipun ubengan artá saking sadéan wau pancénipun sampun nambah karaharjan párá kawulá.
Gubernur Jenderal Baron van der Capellen utawi asmá jangkepipun Godert Alexander Gerard Philip Baron van der Capellen tindak keliling Jawi kanggé nepangaken piyambakipun dumateng bongsá Jawi minongká Gubernur Jenderal ingkang énggal.
Sadangunipun tindak keliling puniká, antawisipun miyos kuthá Tegal, Pekalongan, lajeng Surákartá lan Ngayogyákartá, Gubernur Jenderal Baron van der Capellen saget pirsá bilih párá Bupati bongsá Jawi boten marem tumrap kahanan wekdal semanten ugi kuwatos kécalan kalenggahanipun.
Pramilá Gubernur Jenderal Baron van der Capellen paring resolusi ing taun 1820, taun kaping sepindhah pamréntahanipun, ingkang antawisipun ngemu pranatan kanthi cethá babagan kalenggahan párá Bupati, hak-hakipun, kewajiban-kewajibanipun, sáhá titelipun minongká pangarsá bongsá pribumi.
Ing Semarang, sasampunipun konferensi kalih tuwan Muntinghe, Komisaris Palembang lan Bangka, boten kalih Mayor Jenderal de Kock sáhá Laksamana Wolterbeek, dipuntemtoaken bilih bakal dipunpundhut tumindak tumrap Sultan Palèmbang, Machmoed-Badroedin. Dumateng Laksamana Wolterbeek dipunpréntahaken miwiti ekspedisi militer, lajeng piyambakipun énggal budhal tindak mriká.
