DEN HAAG – Gusti Kanjeng Ratu Máxima Zorreguieta (lair ing Buenos Aires, Argentinië, 17 Mei 1971) ningkah pikantuk Ngarsá Dalem Rájá Willem-Alexander, dinten Setu 2 Februari 2002 ing Amsterdam.
Wekdal semanten Ngarsá Dalem Willem-Alexander taksih Pangéran Pati, éwodènten Máxima kawulá biasa saking Argentina, lajeng pikantuk titel Prinses der Nederlanden, Prinses van Oranje-Nassau, mevrouw van Amsberg (Putri Walandi, Putri Oranye-Nassau, bandárá Amsberg). Sasampunipun Pangéran Pati jumenengan dados Rájá Karajan Walandi, Máxima ngastá titel Gusti Kanjeng Ratu.
GKR Máxima: Goedendag (Sugeng siang)
Matthijs van Nieuwkerk: Goedemorgen (Sugeng énjing)
GKR Máxima: Welkom… (Sugeng rawuh…)
Matthijs van Nieuwkerk: Dank u wel (Matur nuwun)
GKR Máxima: …op Huis ten Bosch (…ing Kraton Huis ten Bosch)
Matthijs van Nieuwkerk: Dank u wel… (Matur nuwun…)
GKR Máxima: Mooi dat u hier bent (bingah sanget panjenengan rawuh mriki)
Matthijs van Nieuwkerk: Dank u wel… alvast gefeliciteerd (Matur nuwun… sadèrèngipun ngaturaken sugeng tanggap warsá)
GKR Máxima: Dank u wel… ja, 50 geworden, niet niks (Matur nuwun… inggih, dados sèket taun… boten tanpá makna)
Matthijs van Nieuwkerk: Is het niet niks? (Boten tanpá makna?)
GKR Máxima: Nou denk ik niet (Kulá kinten boten)
Matthijs van Nieuwkerk: Hoe voelt het? (Pripun raosipun?)
GKR Máxima: Euh…nou prima.. prima. Ietjes ouder, elke dag, maar dankbaar dat ik ouder mag zijn… worden… (Euh.. inggih sekécá… sekécá… tambah sepuh, saben dinten… nanging syukur bilih kulá saget sepuh… dados sepuh…)
Puniká wau sempilan saking siaran gelar-gunem Gusti Kanjeng Ratu Máxima minongká riyáyá dinten tanggap warsanipun ingkang kaping 50, NPO1 Senèn (17/5/2021).
Sarèhning Gusti Kanjeng Ratu Máxima sanès priyantun Walandi asli, wiwitanipun ugi boten saget básá Walandi. Amargi piyambakipun bakal ndhampingi Ngarsá Dalem, dados Ratu lan Ibu Nagari, Máxima kedah saget básá Walandi kanthi saé.
Saking siaran gelar-gunem wau, Gusti Kanjeng Ratu Máxima kejawi sinau ugi nyariosaken bilih piyambakipun ugi nyaru nganggé wig (rikmá palsu) warni cemeng keliling Walandi, supados saget latihan básá Walandi guneman langsung kalihan kawulá Walandi.
Minongká tunangan Pangéran Pati Karajan Walandi, Máxima temtu boten saget bébas medal griyá srawungan kalih kawulá. Pramilá piyambakipun undercover alias nyaru saénggá saget lenggah ing café, dhahar bitterballen (camilan khas Walandi bunder saking daging).
“Kanggé latihan básá Walandi. Nitih mobil lan mbetá péta ageng (wekdal semanten dèreng wonten Google Map, red) kulá keliling Walandi. Kadhang kálá sareng-sareng réncang, kadhang piyambakan,” makaten Gusti Kanjeng Ratu Máxima.