DEN HAAG – Guru Matematika Menno Lagerwey (27) maringi video latihan ujian, pikantuk imbalan rècèh € 2,5 nanging totalipun jebul kathah.
Pak Guru Menno maringi piwulang matematika gratis ing YouTube, ing mriku piyambakipun nerangaken matematika ingkang gampil dipunpahami déning laré-laré sekolah ingkang badhé ngadhepi ujian nasional. Minongká imbalan matur nuwun, piyambakipun nyuwun pandhèrèkipun (followers) ngisi Tikkie artá rècèh € 2,5 kanggé 1 gelas bir ing teras café. Kasilipun jebul mbingahaken, nanging Menno boten karsá nyebataken pinten.
Pinten kinten-kinten saget dipunprakiraaken saking cacahipun followers. Sapuniká kanalipun Pak Guru Menno ing Youtube inggih puniká Math with Menno (Matematika Sareng Menno) sampun pikantuk 45.000 subscribers utawi pelanggan. Saben dintenipun piyambakipun ngastá ing Amstelveen College minongká Guru Matematika. Ugi ing wekdal mèh ujian nasional puniká piyambakipun maringi lès privat matematika kanggé nyiapaken ngadhepi ujian pungkasan.
Wonten ing salah satunggaling video paling énggal ingkang minggah dinten Ngahad kálá wingi, Pak Guru Menno nyariosaken bilih piyambakipun asring pikantuk pitakènan pripun caranipun laré-laré sekolah saget maringi piyambakipun tándhá matur nuwun kanggé video gratisipun.
“Yèn arep mbales aku, upamané amargá aku wis bantu akèh anggoné ngadhepi ujianmu, monggo kená-kená waé. Mungguhé aku kétoké énak yèn musim panas mengko bisá jagongan nang teras café lan ngrasaké bir sing énak,” makaten Pak Guru Menno mangsuli párá siswá pandhèrèkipun.
Mawi video paling énggal Pak Guru Menno ngaturaken bilih wangsulan wau langsung manèn suksès ageng. “Cah-cah aku kesuwun temenan,” ngendiká Pak Guru Menno kados kapethik saking Algemeen Dagblad, dinten Rebo (19/5/2021).
Nanging pinten cacahipun pandhèrèk utawi followers ingkang transfèr ngintun € 2,5? Pak Guru Menno tetep boten karsá blak-blakan. Menawi separuh mawon saking followersipun ingkang transfers € 2,5 kasilipun sampun cekap kathah.
“Kulá pikantuk cekap transfèran ingkang lumayan kanggé wekdal bentèr samangké, makaten mawon. Lan kulá bingah sanget saget pikantuk imbalan, sarèhning imbalan saking iklan taksih sakedhik sanget,” makaten Pak Guru Menno.
Miturut Pak Guru Menno, cacahipun artá ingkang mili mlebet ing rekeningipun saget njamin piyambakipun taun ngajeng ngirangi jam mulang ing sekolah, lajeng saget langkung kathah kagungan wekdal kanggé damel velideo-video pelajaran matematika. Menno mprakiraaken kirang langkung 10 video saben minggunipun.