DEN HAAG – Gusti Kanjeng Ratu Máxima dinten sapuniká 17 Mei ambal warsá ingkang kaping 51. Nanging boten dipunriyayaaken kanthi ageng kados tahun-tahun ingkang kapungkur.
“Sarèhning kaluargi kraton taksih ndèrèk belá sungkáwá,” makaten Rijksvoorlichtingsdienst (17/5).
Dinten Setu kálá wingi asmanipun Ngarsá Dalem Rájá Willem-Alexander sakeluargi medal ing réklame lelayu Jan de Beaufort (19), putranipun Frans de Beaufort, réncang caket Ngarsá Dalem.
Jan de Beaufort kapundhut minggu kapungkur, lajeng dinten sapuniká badhé dipunsaréaken, kaleresan sareng kaliyan dinten ambal warsanipun Gusti Kanjeng Ratu.
Kang Bápá Frans de Beaufort sampun dangu reréncangan kaliyan Ngarsá Dalem, malah dados seksi nikahipun Ngarsá Dalem & Ratu Máxima (2002), ugi dados bápá angkatipun Putri Alexia naliká lahir.
Pramilá piyambakipun boten ngawontenaken riyáyá kanthi ageng, malah makaryá kados biasa. Ngarsá Dalem antawisipun nampi Menteri Mancá Ukraina Dmytro Kuleba ing Kraton Huis ten Bosch.
Senaosá makaten minongká tradisi Gusti Kanjeng Ratu Màxima tetep nindakaken sèsi foto ènggal. Piyambakipun ngagem busáná kelir biru peteng mawi corak print. Párá kawulá sami ngaturaken ndèrèk bingah ugi atur dongá.
Kawulá Biasa
Gusti Kanjeng Ratu Máxima Zorreguieta (lair ing Buenos Aires, Argentina, 17 Mei 1971) ningkah pikantuk Ngarsá Dalem Rájá Willem-Alexander, dinten Setu 2 Februari 2002 ing Amsterdam.
Wekdal semanten Ngarsá Dalem taksih Pangéran Pati, éwodènten Máxima kawulá biasa, lajeng pikantuk titel Prinses der Nederlanden, Prinses van Oranje-Nassau, mevrouw van Amsberg. Sasampunipun Pangéran Pati jumenengan, Máxima ngastá titel Ratu.
Sarèhning piyambakipun sanès priyantun Walandi asli, wiwitanipun ugi boten saget básá Walandi. Máxima kedah saget básá Walandi kanthi saé, amargi piyambakipun bakal ndhampingi Ngarsá Dalem, dados Ratu lan Ibu Nagari.
Piyambakipun kejawi sinau ugi nyaru nganggé wig (rikmá palsu) warni cemeng keliling Walandi, supados saget latihan básá Walandi guneman langsung kaliyan párá kawulá Walandi.
Minongká tunangan Pangéran Pati, Máxima boten saget bébas medal srawungan kalih kawulá. Pramilá piyambakipun nyaru supados saget lenggah ing café, dhahar bitterballen (camilan khas Walandi), guneman.
“Kanggé latihan básá Walandi. Nitih mobil lan mbetá péta ageng kulá keliling Walandi. Kadhang kálá sareng-sareng réncang, kadhang piyambakan,” makaten Gusti Ratu (es/es).