ROMA – Gusti Kanjeng Ratu Máxima tuwi kriyá dateng KTT G20 ing Roma, dinten Kemis (28/10) siang dugi Ngahad (31/10).
Gusti Kanjeng Ratu Máxima rawuh miturut kalenggahanipun minongká advokat khusus Sèkjèn PBB bidang reragad sesarengan kanggé bebangun (UNSGSA) sáhá pangarsá kinurmatan Global Partnership for Financial Inclusion/GPFI (Kamitran Global kanggé Bebayar Sesarengan, red) G20.
Italië sapuniká dugi mangké 30 November dados pangarsá G20. Tema saking pangarsá Italia inggih puniká People, Planet and Prosperity (Rakyat, Bumi lan Karaharjan).
Gusti Kanjeng Ratu Máxima sareng kaliyan PM Italia Mario Draghi dinten Setu (30/10) ugi dados tuan rumah acara sisipan G20 inggih puniká Mbiyantu UKM sáhá Bisnis Kagunganipun Wanitá kanggé Mbangun Langkung Saé Malih, makaten Rijksvoorlichtingsdienst mawi serat pawartá ingkang dipuntampi Het Javaanse Blad (28/10).
Piyambakipun, dipunrawuhi párá pangarsá pamréntahan, ngaturaken pidato cekak aos babagan punápá ingkang dipunbetahaken kanggé pamulihan lan tuwuhipun UKM lan pripun ndamel UKM saget pengkuh bebayaripun.
Sadonyá UKM puniká wigatos sanget kanggé nyedyani pakaryan lan ngisi lakon ageng ing pamulihan ékonomi naliká lan sasampunipun krisis Corona. Panelitèn Wereldbank Group nedhahaken bilih kathah budidáyá alit ingkang kénging krisis, khususipun kagunganipun párá juragan wanitá ing negari-negari ingkang dèrèng majeng.
Gusti Kanjeng Ratu Máxima antawisipun ugi dhawuh wigatosipun bebayar ingkang inovatif kanggé budidáyá ingkang boten saget pilantuk utang saking bank. Puniká ngaling-ngalingi budidáyá wau tuwuh lan megar. Kajawi makaten Ratu ugi dhawuh supados párá juragan alit wau dipungatosaken supados saget ndandani caranipun budidáyá lan damel ageng kasilipun, ugi kawigatosanipun digitalisasi.
Salajengipun Gusti Kanjeng Ratu Máxima ing sisipanipun KTT G20 ugi nindakaken rembugan kaliyan párá wakil pamréntahan ingkang aktif ndandani layanan bebayar. Piyambakipun ugi ngrawuhi pinten-pinten rembugan sanèsipun sadangunipun KTT G20 wau.