DEN HAAG – Gusti Kanjeng Ratu Máxima karsá ngrawuhi orasi virtual kakalih pangastá Prins Claus Leerstoel (PCL) inggih puniká Prof. Gustavo García López lan Prof. Seye Abimbola mangké dinten Kemis énjing (10/6/2021).
gegandhènganipun antawis kanjomplangan sosial sajagad lan tujuan pambangunan PBB
Prof. García López puniká saking 2019 dugi 2021 minongká pangastá ingkang kadhaup kaliyan International Institute of Social Studies (ISS) saking Erasmus Universiteit Rotterdam. Orasinipun katundhá setaun amargi pandemi Corona, makaten serat pawartá Rijksvoorlichtingsdienst ingkang dipuntampi Het Javaanse Blad, Rebo (12/5/2021).
Téma panelitian Prof. García López inggih puniká Duurzame Ontwikkeling, Ongelijkheid en Milieurechtvaardigheid (Pambangunan Lestari, Kanjomplangan, lan Kaadilan Lingkungan).
Supados pikantuk paningalan perkawis kanjomplangan ing pambangunan masyarakat, Prof. García López neliti gegandhènganipun antawis kanjomplangan sosial sajagad lan tujuan pambangunan PBB. Piyambakipun makaryá sareng kaliyan kolega ISS lan universitas sanèsipun, antawisipun Universiteit van Amsterdam (UVA) lan Institute of Development Studies (IDS).
ingkang ndadosaken kanjomplangan ing wekdal kapengker, kados kolonisasi, diskriminasi
Éwodènten Prof. Abimbola saking 2020 dugi 2022 lenggah minongká pangastá ingkang kadhaup kaliyan Universiteit Utrecht. Panelitianipun tinuju dateng Rechtvaardigheid in Wereldwijd Gezondheidsonderzoek (Kaadilan ing Panelitian Kaséhatan Global) kanthi fokus ing pangurusing pranátá kaséhatan kanggé majengaken kaséhatan masyarakat sajagad.
Mungguhipun Prof. Abimbola inggih puniká sinten kémawon boten ningali asal-usulipun, piyambakipun kedah pikantuk pangaos-aos tumrap pamulasárá lan kasarasan ingkang sami.
Ing mriki Prof. Abimbola nggayutaken faktor-faktor ingkang ndadosaken kanjomplangan ing wekdal kapengker, kados kolonisasi, diskriminasi, kanjomplangan ingkang sampun madeg, lan kanjomplangan kuwaosan. Prof. Abimbola makaryá sareng kaliyan párá ilmuwan saking Universitair Medisch Centrum Utrecht (Griyá Sakit Akademis Utrecht) lan Koninklijk instituut voor de Tropen.
Salebetingp acárá puniká, pangarsá kuratorium wekdal sapuniká Prof. Louise Gunning-Schepers badhé ngaturaken tugasipun dumateng Guru Besar Luar Biasa Katentreman, Hukum, lan Kaamanan Prof. Bert Koenders saking Universiteit Leiden. Piyambakipun antawis 2014 dugi 2017 naté dados Menteri Máncánagari Walandi.
PCL dipunadegaken ing 2003 déning ISS lan Universiteit Utrecht kanthi tujuan andum kawruh lan maringi dorongan kanggé párá ilmuwan enèm saking nagari-nagari ingkang taksih mbangun. Éwodènten universitas-universitas mawi panelitian lan piwulangan nggadhahi karsá majengaken sarujuk kaliyan pamikiran lan paningalanipun Pangèran Claus.
Gusti Kanjeng Ratu Máxima sapuniká lenggah ing PCL minongká pangayom. Dugi wiwitan taun 2014 piyambakipun naté dados pangarsá kuratorium PCL. (es/es)
