BATANG – Dinten Kemis landraad (pangadilan) ing Batang, Pekalongan, miwiti sidang perkawis pidana kalawan kadakwá Nitisemito, alamat dhusun Pabuaran, distrik Ciledug, pakaryan sudagar; Karsijan, alamat dhusun Denasri Wétan, subdistrik Baros (Batang); Karnan, alamat dhusun Kalipucang Kulon, subdistrik Baros (Batang), pakaryan dagang kéwan; Ansar, alamat kampung Ketung distrik Batang, pakaryan kuli; Koesen dhusun Kauman, pakaryan damel batik.
Bilih tiyang-tiyang wau dipundakwá sareng-sareng lan mufakat tumindak jahat sesarengan kalih Sapar ingkang sapuniká dèrèng kacepeng, makathen kados kapethik saking De Locomotief, serat kabar babaran Uitgever De Groot, Kolff & Co, Semarang, dinten Senèn (27/3/1933).
Kasebat sadangunipun sasi Juli 1932 kapengker ing pinten-pinten panggènan kabupatèn Pekalongan, Batang, lan Semarang, kelompok wau kanthi tujuan mundhut bathi kanggé piyambak utawi sareng-sareng mawi cárá nipu lan ceriyos palsu kalawan korban Kapil, alamat Moeljoredjo, subdistrik Tirto, lan korban Satar, alamat dhukuh Setono, dhusun Dekoro, subdistrik Baros (Batang), ndadosaken Kapil nyerahaken artá 44,5 gulden lan Satar 12,5 gulden.
Párá kadakwá ngiming-imingi sadéan artá Jerman dumateng párá korban, bilih piyambakipun mangké dateng Konsul Jerman ing Semarang saget ngijolaken artá Jerman wau dados artá gulden kanthi bathinipun ngantos 15% saking regi nominalipun.
Kapil lan Satar lajeng kapincut tumbas artá Jerman wau lajeng badhé ngijolaken. Salajengipun párá kadakwá wau ngapusi bilih piyambakipun saget mbiyantu Kapil lan Satar ngurus ngijolaken artá Jerman wau nanging kedah mbayar pinten-pinten artá kanggé ongkos késah (dateng Semarang).
Sarèhning kabujuk iming-iming palsu lan apusan wau, Kapil lan Satar taksih maringaken artá malih dumateng párá kedakwá, dados total cacahipun langkung kathah malih saking ongká kasebat wau.
Sidang salajengipun dipuntundhá dugi tanggal 3 April samangké. (es/es)