DEN HAAG – Sebagéan ibu-ibu saget kènging infèksi jamur Candida ing pawestrèn. Panelitèn ilmiah mbuktiaken bilih yoghurt ampuh ndayagunani kanggé támbá.
Yogurt puniká támbá alami ingkang umum cumawis ing griyá kanggé nambani infeksi jamur ing pawestrèn. Panelitèn nedhahaken bilih nganggé supositoria yoghurt saget mbiyantu nanggulangi infeksi wau, makaten Medical News Today kapundhut dinten Kemis (21/10).
Pinten-pinten sel ragi jamur lan bakteri saget numpuk ing pawestrèn lajeng dados infeksi jamur naliká jamur ingkang nami Candida jumlahipun langkung kathah.
Seratan puniká ngaturaken kawruh babagan yoghurt minongká támbá kanggé nambani infèksi jamur ing pawestrèn, ugi nerangaken cárá nganggénipun ingkang paling ndayagunani.
Faktor-faktor ingkang saget ngganggu kaseimbangan alamiah dados infèksi jamur ing pawestrèn:
- owahing hormon,
- ngunjuk antibiotika,
- jimak,
- nganggé pewangi utawi sabun intim,
- kemproh nganggé pembalut, mboten rutin gantos,
- nganggé CD sesek mlethet.
Gejala-gejala infeksi jamur ing pawestrèn antawisipun:
- raos gatel ing pawestrèn,
- raos panas kebakar ing pawestrèn,
- keputihan, pethak kenthel, mrenthel-mrenthel.
Caranipun nganggé yoghurt kanggé nambani infèksi jamur
Ingkang paling utami dipungatosaken kedah nganggé yoghurt ingkang murni, inggih puniká yoghurt alami ingkang ngandhut bakteri Lactobacillus tanpá nganggé raos tambahan, kelir, lan gendhis. Bahan-bahan tambahan wau malah saget ndadosaken infèksi sangsáyá nemen.
Mlebetaken
Mlebetaken yoghurt ing pawestrèn boten gampil, nanging strategi puniká saget mbiyantu:
- Nganggé driji kanggé mlebetaken yoghurt satunggal séndhok utawi langkung.
- Isi aplikator tampon ingkang boten kanggé nganggé yoghurt lajeng lebetaken ing pawestrèn.
- Kanggé ngadhemaken pawestrén ingkang raos perih kebakar, isi aplikator tampon nganggé yoghurt, simpen sekedhap ing freezer, lajeng nembé lebetaken ing pawestrèn.
Kénging punápá nganggé yoghurt kanggé nambani infeksi jamur?
Sebagéan priyantun langkung remen nganggé támbá alami kanggé nambani infèksi jamur amargi:
- Kuatos èfèk dhèrèkan (èfèk samping) menawi nganggé obat antijamur.
- Wonten raos kuatos bilih obat antijamur saget ndadosaken jamur tambah kebal.
- Tambá alami ingkang cumawis ing griyá langkung sekécá lan boten awis tinimbang obat medis.
Yoghurt ampuh ndayagunani amargi ngandhut bakteri Lactobacillus. Bakteri puniká kanthi alamiah sampun wonten ing usus, saluran toyá seni lan pawestrèn tanpá ngganggu panggènan-panggènan wau.
Pramilá nganggé yoghurt ingkang ngandhut bakteri Lactobacillus wau saget mangsulaken kaseimbangan ragi lan bakteri ing pawestrèn. Lactobacillus ugi medalaken hidrogen peroksida ingkang mejahi Candida, saénggá mbiyantu nanggulangi infèksi jamur wau.
Kejawi makaten, sarèhning yoghurt puniká adhem anyes pramilá saget énggal ngicalaken raos gatel utawi raos panas kebakar.
Miturut panelitèn
Nyampuraken yoghurt kalih madu jebul ampuh kanggé nambani infèksi jamur pawestrèn tumrap ibu-ibu ingkang mbobot, makaten miturut panelitèn tahun 2012.
Panelitèn tahun 2015 ugi paring dhawuh bilih èfèk támbá nganggé yoghurt kadosipun langkung ampuh ndayagunani tinimbang krim antijamur klotrimazol (Canesten).
Éwodènten U.S. National Library of Medicine (Pabukon Kedokteran Nasional AS) ngaturaken bilih supositoria saking yogurt ingkang ngandhut Lactobacillus saget mbiyantu nambani infèksi jamur. Pabukon puniká ugi wanti-wanti bilih dhahar yoghurt boten saget kanggé nyegah infèksi jamur wau.
Risiko, Tetimbangan
Yoghurt murni alami ingkang ngandhut Lactobacillus lan tanpá gendhis saget mbiyantu kanggé nambani infèksi ing pawestrèn lan ngedhemaken gejalanipun. Awas, kedah yoghurt ingkang murni (anyep tur kecut sanget). Yoghurt ingkang manis ngandhut gendhis malah saget ndadosaken infèksi sangsáyá nemen, sarèhning gendhis nyebabaken ragi jamur tuwuh tambah kathah. Kejawi makaten, yoghurt pancèn ampuh ndayagunani kanggé támbá infèksi jamur, nanging saget mawon alon mboten rikat kados krim antijamur.
Támbá pakem, gejala, jalaran
Wonten obat pil, krim, sáhá supositoria kanggé nambani infèksi jamur. Pawestrèn nggadhahi kahanan lingkungan ragi lan bakteri ingkang seimbang. Menawi kaseimbangan wau kaganggu, ragi jamur Candida langkung kathah, pramilá saget dados infeksi jamur.
Kapan kedah tindak dateng dokter?
Infèksi jamur ing pawestrèn lumrah dipunalami sebagéan ibu-ibu, saget dipuntambani, boten usah dipunkuwatosaken. Menawi raos sakit dangu boten ical-ical utawi wonten gejala sanèsipun pramilá kedah tindak dateng dokter supados saget dipunpriksá mbok menawi wonten sebab sanèsipun.