DEN HAAG – Idul Fitri ing Walandi dipunwastani Suikerfeest (harfiah: dinten riáyá gendhis), dinten riáyá ingkang kathah pasegahan sarwá manis.
Temtu kémawon nami Suikerfeest boten mathuk kaliyan tegesipun Idul Fitri miturut agami, kados kawulá Indonesia ugi gadhah nami ingkang bènten malih inggih puniká lebaran, utawi bádá kanggé párá kawulá Jawi.
Nami Suikerfeest asalipun saking kawulá Turki ing Walandi, sarèhning kawulá Turki miturut tradisi naliká wekdal Idul Fitri biasa nyaosaken pasegahan sarwá manis, kadostá: baklava, kunéfé, kataifi, lokum, lokma, kazandibi, dondurma, firinda sutlac.
Ing básá Turki dinten Idul Fitri puniká dipunwastani Şeker Bayramı (Şeker = gendhis; Bayramı = dinten riáyá), dados nami Suikerfeest kadosipun minongká tarjamahan langsung saking tembung Şeker Bayramı wau. Kadhang kálá kawulá Turki ugi nganggé tembung Ramazan Bayramı kanggé nyebat Idul Fitri: Ramazan = Ramadan, Bayramı = dinten riáyá.
Kawulá Arab Marokko ing Walandi ugi miturut tradisinipun menawi Idul Fitri biasa ngaturaken pasegahan ingkang sarwá manis, antawisipun chebakia, harcha, briouats, ghoriba, brioche, lan sellou. Umumipun kawulá Arab langkung remen nganggé nami Idul Fitri, sebab nami Suikerfeest tegesipun mligi tinuju urusan dhahar.
Nami sanèsipun kanggé Idul Fitri ing tengahing kawulá Arab Marokko ing Walandi inggih puniká Ied el-Seghir (عيدالصغير), tegesipun Klein Feest (dinten riáyá alit), éwodenten Idul Adha dipunwastani Grote Feest (dinten riáyá ageng). Kawulá ing Walandi kathahipun nganggé nami Suikerfeest, ugi saget dipunpanggihi ing guneman-guneman, jurnal, kalender, dokumèn, sáhá media. (es/es)