SOLO – Inlander udud klobot, klaras, kawung. Priyantun Walandi ududipun merk Mignot & De Block: Fleur de Amsterdam, Van Nelle, Kansas, Blue Ribbon, Richmond, Ardath.
Tradisi udud sanès kabudayan bongsá pribumi Nuswantárá, nanging niru bongsá Walandi ingkang nepangaken udud saking tradisi bongsá Indian, Amérika.
satá = mbako (ngoko)
Het Javaanse Blad
Bongsá Walandi udud pipá cangklong, cerutu, pegánipun wangi semribit, awis sanget. Utawi udud ‘witte sigaretten‘ (rokok putih, rokok pethak).
Kadostá merk De Olifant VOC saking De Oude Leeuw, lajeng cerutu damelan Mignot & De Block: Princesas, Fleur de Amsterdam, Fleur de la Hollande, Sublimes, La Semeuse lan Pelikaan.
Lajeng udud rokok pethak Van Nelle, utawi Faroka, Kansas, Wembley, Blue Ribbon, Richmond, Monaco, Aida, Golden, Eagle, lan Davros damelan pabrik N.V. tot Exploitatie van Ciggarettenfabrieken Faroka ing Malang.
Klaras, Kawung
Párá kawulá inlander alias pribumi ududipun punápá? Wekdal semanten kathahipun udud linthingan nganggé godhong-godhongan, makaten miturut monografi “Tabak” (Satá) saking dines pajek Walandi.
Umumipun wonten kalih godhong kanggé udud: klaras, saking godhong utawi kulit jagung; kawung, saking godhong nipah. Sabagéan pabrik ing Bandung lan Priangan nganggé godhong arèn.
Klaras lan kawung wau dipuntalèni nganggé blóngsong. Isinipun satá (mbako) langkung sakedhik, pramilá rupinipun langkung lencir tur langkung dowi tinimbang rokok pethak.
Isi rokok linthingan pribumi puniká nganggé campuran cengkèh, menyan, lan gendhis, dados pegánipun kenceng ambet menyan. Párá kawulá ing Solo mastani puniká ‘rokok diko’.
Kawulá Ngajogjákartá-Surákartá langkung remen linthingan nganggé pupus, konya lan kawung. Pupus inggih puniká saking godhong pisang anèm, konya saking godhong nipah, lajeng kawung saking godhong arèn.
Rokok linthingan saking pupus dipuntutup raket mawi lèm, éwodènten konyá lan kawung nganggé blóngsong.
Racikan isi rokok pupus, konya lan kawung antawisipun nganggé campuran satá Tuban lajeng 15 bahan antawisipun gendhis, cengkèh, kajeng legi, klembak, cendáná lan kecubung.
Ing daérah adhem kados Kedu lan Banyumas párá kawulá mriká langkung remen udud rokok linthingan khas Wonosobo, ingkang ngandhut 50% satá lajeng 50% malih klembak, menyan, lan cengkèh.