SURÁKARTÁ – Serat Jurumartani (Ongká 1, 7 Januari 1869). Saking pawartosipun sasakit kolera ing nagari Surákartá sapuniká sampun kathah sudanipun, ananging sakiwatengenipun nagari sangsáyá sanget.
Ing dhusun Singon titiyangipun jaler sami pejah sadáyá, namung kantun jajak satunggal ingkang saweg dhateng dhusun ing ngriku menggah jampi dalima pethak puniká sampun kajampékaken dhateng tiyang sakit kolera kathahipun 11 iji, ingkang gesang 10, pejah satunggal.
suket (ngoko); rumput (krámá inggil)
Bab jampi kolera cárá Jawi ingkang prasájá sanget.
Menggah jampi kolera cárá jawi kados ingkang sampun kapratélakaken déning tuwan Korper puniká andadosaken pamikiring tiyang, bokmanawi panunggilanipun jampi kolera ingkang kadamel saking pamanggih Jawi badhé migunani dhateng ingkang sami sakit kolera. Pratélanipun kados ing ngandhap puniká:
Jampi kolera wau ingkang kadamel saking rumput teki sagodhong uwit tuwin oyodipun, puniká kapipisá, lajeng kaperes toyanipun sáhá kadèkèkan sarem sawuku, toyá teki wau kaunjuk saben sonten manawi badhé saré, kaambalan ing saben sonten salaminipun taksih wonten sasakit kolera, déné kathahing toyá rumput teki wau namung dados sacegukan.
Pawartosipun jampi rumput teki wau angsalipun saking wawangsitipun Sunan Lawu Wonten tiyang tani agagriyá celak ing redi Lawu, kálá wonten sasakit kolera ing siti dhusun kaprenah celak kaliyan redi Lawu, tiyang tani puniká anyupená kapanggih kaliyan Sunan Lawu, ingkang lajeng amangsit dhateng piyambakipun kinèn anganggé jampi rumput teki bilih wonten tiyang ingkang kènging sakit kolera, dènè jampi rumput teki wau kawastanan déning Sunan Lawu, racun utawi wisá panulaking sasakit kolera.