BERLIN – Jerman netepaken pranatan wiwit dinten Ngahad malem Senèn bilih wargi India boten kénging mlebet wilayahipun.
Namung wargi Jerman piyambak ingkang kundur saking India taksih kénging mlebet, kanthi syarat saget nedhahaken serat tès negatif Corona lan kedah karantina dangunipun 14 dinten, makaten Mentri Keséhatan Jens Spahn, paring wárá-wárá mawi Twitter dinten Setu (24/4/2031).
“Mutasi virus ingkang kepanggih ing India damel kitá kuwatos sanget. Supados boten mbebayani kampanye vaksinasi kitá, pramilá késahan saking India kedah dipunwatesi,” ngendika Spahn.
Negari-negari sanèsipun ugi sampun langkung énggal matesi késahan saking India. Ing Jerman dugi dinten Setu sapuniká sampun wonten 25 panularan varian saking India. Mutasi virus Corona puniká langkung nulari tinimbang varian ingkang sampun wonten ing Eropa.
Varian India puniká sapuniká ugi kepanggih ing Swiss. Inggris dinten Setu sampun nglarang tiyang-tiyang saking India mlebet wilayahipun. Sadèrèngipun Indonesia lan Kanada ugi sampun netepaken pranatan ingkang sami.
Sawetawis puniká Belgia ugi ngersaaken pranatan ingkang langkung teges tumrap tiyang-tiyang késahan amargi virus Corona varian India. Éwodéné Mentri Keséhatan Walandi Hugo de Jonge sampun ngendiká dinten Kemis bilih sawetawis dèrèng wonten larangan tiyang saking India mlebet Walandi.
India sapuniká ngadhepi gelombang Corona kaping kalih ingkang awrat sanget, ingkang miturut párá ahli dèrèng dugi titik puncakipun. Saben dinten èwonan warginipun positif tès. Sarèhning kathah panularan, kantor-kantor kanggé tès Corona boten saguh ngadhepi. Griyá-griyá Sakit ugi kuwalahan, boten cekap obat-obatan lan panggénan kanggé pasien Corona. (es/es)