DEN HAAG – Wiwit dinten Setu, 15 Januari 2022, toko-toko kénging bika malih, nanging dipunwatesi dugi jam 17.00, pelanggan saget mlebet tanpá damel janji.
Salajengipun párá pelanggan wajib nganggé masker, ugi jumlah pelanggan ingkang mlebet dipunwatesi mawi ukuran 1 pelanggan per 5 m2. Salon lan panggénan olahraga ugi kénging bika malih.
Nanging rèstoran lan café sáhá gedhong kabudayan taksih kedah tutup 10 dinten malih dugi tanggal 26 Januari 2022. Kabinèt dèrèng maringi idin senaosá wonten unjuk raos ing pinten-pinten panggènan ing Walandi.
“Dèrèng wancinipun maringi idin sèktor puniká kanggé bika malih,” makaten PM Mark Rutte naliká ngaturaken konferènsi pèrs dinten Jemuah (14/1/2022).
Miturut Rutte, pancènipun boten sedáyá saget bika malih sareng-sareng, sarèhning ongká panularan taksih inggil. Piyambakipun ngendiká saget mangertosi bilih dhawuh kabinèt puniká dipunraosaken boten adil déning tiyang-tiyang ingkang makaryá ing rèstoran lan café.
Kabinèt ugi miyaraken dhawuh nganggé masker, wonten pundi mawon menawi boten saget jagi let 1,5 mèter pramilá wajib nganggé masker, kados ing gang-gang tetokoan lan ing panggènan makaryá.
Ugi PM Mark Rutte paring dhawuh bilih masker saking bahan kain boten netepi syarat. Langkung saé menawi párá kawulá nganggé masker medis.
Sawetawis puniká Menteri Keséhatan Ernst Kuipers ngendiká bilih sasampunipun kalih taun kitá sapuniká dugi ing tataran énggal pandemi.
“Pramilá kitá kedah sinau gesang kaliyan virus Corona senaosá virus puniká tansah mutasi. Déning varian Omikron kathah tiyang ingkang katularan, nanging kabinèt sampun nimbang-nimbang mundhut risiko kanggé angglonggaraken lockdown. Amargi kedahipun makaten,” ngendikanipun Menteri Kuipers.
Sadèrèngipun pamréntah Walandi netepaken lockdown malih wiwit 19 Desember jam 05.00 dugi sakirangipun 14 Januari 2022, sarèhning wonten bebáyá varian Omikron. Namung toko sembako lan apotik ingkang kénging biká.
Makaten dipunaturaken déning Perdana Menteri Mark Rutte naliká maringi konferènsi pèrs dinten Setu dalu (18/12/2021) jam 19.00. Kabinèt sarujuk kaliyan Outbreak Management Team (OMT) ingkang ngaturakan pirembag supados pamréntah netepaken pranatan lockdown kenceng kanggé nanggulangi virus Corona varian Omikron.