DEN HAAG – Pakèt bantuan ékonomi ingkang dipunparingaken kanggé ngadhepi krisis Corona dipunakhiri wiwit 1 Oktober, makaten sumber-sumber Den Haag.
Kabinèt demisioner sampun ngumumaken akhir Juni kapungkur bilih pakèt bantuan kados bantuan gaji Noodmaatregel Overbrugging Werkgelegenheid/NOW (Kabijakan Darurat Kanggé Mbiyantu Pakaryan) sáhá Tegemoetkoming Vaste Lasten/TVL (Panggantosan Béá Ajeg) bakal dipunakhiri per Oktober. Wekdal semanten kabinèt taksih ngamati lan ngendiká menawi taksih wonten kathah usáhá ingkang tutup pramilá bantuan saget dipunparingaken malih.
Wekdal sapuniká kadosipun kabinèt manteb badhé nyetop kanthi definitif pakèt bantuan krisis Corona wau. Punápá malih prakiraan ékonomi saé sanget, pramilá kabinèt ngersaaken ngirangi pakèt bantuan.
Dinten Senèn mangké dipunprakiraaken kabinèt badhé resmi ngumumaken panyetopan bantuan puniká. Salajengipun bakal cethá punápá tumrap sèktor-sèktor katemtu taksih mbetahaken bantuan sasampunipun tanggal 1 Oktober, kados sèktor bisnis wanci dalu lan fèstival, ingkang senaosá sampun wonten palonggaran nanging taksih kangèlan.